عادل عەبدولمەجید؛ ئەوا د خۆدیکێ دا شکەستی

..چ دەمژمێر بارنەکربوون، چ نامەیێن تێلەفۆنێ ژی بۆ نەهات بوون، دەستێ خوە دا بەتەنییێ و ل سەر چاڤێن خوە هەلاند، پارسال هەرۆژ ڤی دەمی ژ خەو رادبوو، دیارە هێشتا ئەڤ دەمە د نەستێ وێ دا یێ مایی، دەستێن خوە بلند کرن و خوە ژێک راکێشا، چاڤێن وێ ب دەرەجکان کەفت، ئێکسەر رابوو ل سەر خوە و قەستا دەرەجکان کر، ئێکەم پێنگاڤ رۆندکەک ژ چاڤان کەفت، ئەڤە سالەکە قەستا ژوورا خوە نەکرییە، ئەڤە هینگێ بریار دابوو نەچیتە بەر خۆدیکێ و سەر و سیمایێ خوە نەبینیت، پێنگاڤا دووێ هاڤێت.. بێی وێ پێن وێ سڤک بوون و ب سەر دەرەجکان کەفت، گەهشتە بەر دەرگەهێ ژوورا خوە و چک راوەستییا. هەر تشت یێ بێدەنگە تەنها ئەو دەمژمێرا ل هنداڤی ژوورا وێ نەبیت، ئەو دەمژمێرا هەمی گرنژین و دلشکەستنێن وێ هژمارتین، ب چک چکا خوە یا بەرپەرێن بیرئانینێن وێ ڤەددەت، ، چاڤێن خوە گرتن، دەستێ خوە دا دەرگەهی و ڤەکر، کوور بێهنا خوە هەلکێشا و تژی هناڤێن وێ بێهنا گۆلاڤێ و پەرتوکان بوو، چاڤێن خوە ڤەکرن، هێشتا ئەو ساکۆیێ رەش یێ ب کۆژییێ ژوورێ ڤە و شالا سۆر یا پێدا شوورە، پەرتوکێن وێ تۆزێ یێن گرتین و تژی ل سەر لێڤێن پەنجەرێ شەمالکێن نیڤ سۆتی نە، ئەو چارچەڤا سپی یا ب تەختێ وێ دا هاتییە خوار، جار دبوو لاندک جار ژی د چاڤێن وێ دا دبوو تابووتەک، ژ دوور چاڤێ وێ ب خۆدیکێ کەفت، ئەڤە سالەکە خوە نەدیتی.. ئەڤە سالەکە یا ژ خوە خەریب..

ئەڤە سالەکە خوە ل بەر نەخەملاندی، دیسان چاڤێن خوە گرتن و بەر ب خۆدیکێ چوو.. راوەستییا، دەستێ خوە برە دیواری و دەستێ وێ ب لێڤا خۆدیکێ کەفت، دەستێ خوە یێ دی ژی هاڤێتە لایێ دی یێ خۆدیکێ، دلێ وێ زێدەتر خوە قۆتا.. بێهنا وێ ب لەزتر هات و چوو.. دەڤێ وێ ڤەبوو.. د وێ بێدەنگییێ دا ما، دڤییا بکەتە قێژی.. دڤییا باخڤیت.. دڤییا بکەتە غار.. دڤییا برەڤیت.. لێ ببوو پەیکەرەکێ پەریشان، خۆدیک ژ دیواری ڤەکر و هێشتا نێزیکی خوە کر، چاڤێن خوە ڤەکرن ئێکسەر خۆدیک ژ دەستان کەفتە بەر پێن وێ و پرتکی، دەستێ خوە دا دەڤێ خوە و گرییا خوە داعیرا، دلۆپ دلۆپ رۆندکێن وێ کەفتنە سەر پرتێن خۆدیکێ، ب هەردو دەستان رۆندکێن خوە ڤەمالین و چاڤێن خوە پەرخاندن، ژووردا سەحکرە پرتێن خۆدیکێ، د ئێکەم پرتا خۆدیکێ را گەردەنا خوە دیت.. ل پشت راوەستییا.. پرچا وێ هەمی برە لایەکی هەردو دەستێن خوە د بن تەنشتا وێ را برن و هێـدی هەناسەیێن خوە یێن گەرم بەردانە بن گۆهێ وێ، لێڤێن خوە یێن تەر ئێخستنە ستۆیێ وێ و ژووردا هاتە گەردەنا وێ تاکو هەمی لەشێ وێ د دەستان دا خاڤ بوویی.. پێ وێ کەفتە سەر پرتەکا خۆدیکێ و جلفەک ڤێکەفت و ژ وێ هزرێ هشیار بوو، چاڤێن وێ ب پرتا ب رەخڤە کەفتن، لێڤێن خوە یێن سپی و قەشافکی تێرا دیتن.. ئەو لێڤێن دەمەکی ژ هەمی شۆرەشان سۆرتر، هەردو دەستێن وێ یێن د دەستێن وی دا و چاڤێن وێ دگرتینە.. خوە نێزیک کر.. دەستێن وێ ئێخستنە تەنشتـێن خوە و یێن خوە ژی ئێخستنە تەنشتێن وێ.. لێڤێن وێ د ناڤ لێڤێن خوە را بەرزەکرن.. تژی ئاڤ ژ کانیکێن دەڤێ ئێکودو دزی.. دەستێن خوە ب کماخێن وێ دا ئینان و برن.. دەڤێ خوە ژ دەڤێ وی ڤە کر و ب تۆندی گۆتێ: “نەء”. هەروەکی نوکە ژی دڤییا بێژیتە هەمی تشتان نەء، دەستێ خوە ئێخستە دەڤێ خوە.. ئاخینکێن خوە داعیران.. خوە چەماندە وێ پرتا خۆدیکێ یا بەری نوکە لێڤێن خوە تێرا دیتین، ئەو پرتە هەلگرت و بەری پشتا خوە راست بکەت، سینگێ خوە د پرتەکا دی را دیت.. سەرێ وی یێ ل بن گۆهێ وێ و بدەنگەکێ گەلەکێ نزم گۆتێ: “دەما دبێژم من تو دڤێی ئانکو من تو ب هەمی ڤە دڤێی..”، دەستێ خوە دا قومچکا بنی یا قەمیسێ وێ و ب سەرکەفت.. هێدی ب سەر ملان دا ئینا خوارێ..

سەرێ خوە برە ملێ وێ یێ دی و لێڤێن خوە ئێخستنە بنێ گوهێ وێ: “من دڤێت تێکەلی ئێک ببین..”، دەستێن خوە د بن کەفشێن وێ را برن.. لەپکێن ئێلەکێ وێ ڤەکرن، مینا پاتێ نڤسی تو ژ سەر سەرتیکی بهەلینی.. دەستێن خوە ئینان و نەرم دانانە بن سینگێ وێ.. چاڤێن خوە گرتن و لێڤێن خوە ئێخستنە نەقەبا مەمکێن وێ.. ب سەرخوەشی لێڤێن خوە ل سەر گەراندن و ب ئەزمانی بشکوژێن وان ئالیستن.. چاڤێن وێ غەوارەبوون و خرێن ژ سینگێ وێ هات و خۆهێ دا و گێژبوو، پشتا خوە راست کر و ئەو پرتا خۆدیکێ یا د دەستان دا کەفت و بژکی، هندی دڤییا بکەتە گری رۆندک نەمابوون، هەمی گری د گەورییێ دا ئاسێ بوو، دڤییا ژ ناڤ وان پرتێن خۆدیکێ دەربکەڤیت، زڤری و پێنگاڤەک هاڤێت، سەحکرە بەر پێ خوە.. رانێ خوە د پرتەکا خۆدیکێ را دیت، چەند نەدڤییا پارچێن لەشێ خوە ببینیت، چەندا پەشیمان بوو پشتی سالەکێ هاتییە بەر خۆدیکێ و خوە دیتییە ڤە، وێ ب تەنێ دڤییا ناڤچاڤێن خوە ببینیت، نەدزانی دێ ئەوێن دەمەکی ل سەر لەشێ وێ بووینە ڤایرۆس، هێنە هزرا وێ، دەستێ خوە ئێخستە رانێ خوە و تبلێن خوە د پرتا خۆدیکێ را دیتن: “هششش، ما نزانی ڤیانا من بۆ تە ل چ ئاستە، ئەز چ جاران ب پەیڤان تێرنابم، مە گەلەک یا ئاخفتی، خوە بێدەنگ بکە دا خوە د ناڤ ئێک دا بەرزە کەین”، تبلێن خوە ب رانێن وێ دا ئینان و برن..

دەستێ خوە برە لێڤا بنی یا ئەتەکێ وێ و گرت.. هێدی هێدی بلند کر و ب سەر لەشێ وێ دا ئینا.. دەستێن خوە ئێخستن تەنشتێن وێ و هەردو تبلێن خوە یێن بەرانان ئێخستنە دبەر تەبانێ وێ را و نەرم ب رانێن وێ یێن مینا زیڤی دا ژووردا برن.. دەستەکێ خوە دا بن سەرێ وێ و دەستێ دی د بن چوکێن وێ را برن.. مینا زارۆکەکێ د خەو دا کەلەخێ وێ ل سەر تەختی درێژ کر.. قۆلپاندە سەر تەنشتێ و خوە ل پشت رازاند: “یێ هشیاری من بە ئەز کچم!”، سەرێ خوە برە دناڤ پرچا وێ را و ب دەنگەکێ مەست گوتێ: “من هەتا وێرێ یا خواندی”، دەستێن خوە ژ رانێن خوە ڤەکرن و ژ هەمی دلێ خوە دخواست نوکە خەلەکەک د تبلا وێ با، هەروەکی ئێک ب دەست دلێ وێ دگڤێشیت، تژی هناڤێن وێ خوین بوو، پێ خوە دانا سەر وێ پرتا خۆدیکێ یا رانێ خوە تێرا دیتی چەند نەدڤییا وێ پرتێ ببینیت، دەمێ پێ خوە وێڤە بری، ئەو پرتا خۆدیکێ یا دناڤ بەرا هەردو لنگێن وێ دا، چاڤێن وێ زیق کرن! رەجفی.. لەرزی.. ترسیا.. هزر کر دێ ئەو پرتا خۆدیکێ کەسەکێ دی ئینیتە بیرا وێ، دێ ئەو پرتا خۆدیکێ پاشەرۆژا وێ هەمییێ ژ ناڤ بەت، مینا شەریتا فلمەکی رۆژانێن خوە ئینانە بیرا خوە، هەمی کریارێن وان کەسان د سەرێ خوە دا ئینان و برن: “نە، کەسێ ئەز نەکریمە ژن، من نەهێلایە کەس نێزیکی وێرێ ببیت، ئەز یا پشت راستم چۆنکی د هەمی چرکەیان دا ئەز یا هشیاری خوە بووم، نە قەت من نەهێلایە، ئەز هێشتا کچم کچ..” بەرێ خوە دا وێ پرتا خۆدیکێ و ب بشکۆرین ڤە تێر بێهنا خوە هەلکێشا: “یا چوویی ئەز نەشێم بزڤرینم لێ ئەز دشێم یا بهێت وەکی یا چوویی لێ نەکەم.” دەستێ خوە دا وێ پرتا خۆدیکێ و راکر، بەرەف پەنجەرێ چوو.. پێن وێ گەلەک ئێشان.. سەحکرە پشت خوە.. تژی خوین یا ل سەر وان پرتێن خۆدیکێ: “دبێژن خوین قۆربانییە، من ژی قۆربانییا خوە دا.”، هەناسەیەک بەردا سەر پرتا خۆدیکێ و ب دەستێ خوە پاقژ کر، کرە د کۆژییێ پەنجەرێ دا و بەرێ وێ دا باژێری: “تو هێمایێ پەردا کچینییا منی، ئەز دێ ژ ئەڤرۆ پێدا ڤی جڤاکی د تەدا بینم، ژبەرکو ئەڤ جڤاکە ژی من د تە دا دبینیت..”.

دهۆک/ ئەیلولا 2016ێ.