په‌ریسا عومه‌ر

پەریسا عومەر؛ به‌رەڤ جهەکێ دی


Loading

چاڤێن خو ڤەدکەم ب وێ هیڤیێ یا دوهی من دیتی خەون بیت، و دەمێ ئەز بەرەڤ خودیکێ ڤە بچم یا جوان بم ئەز هەست ب گرانیەکێ دکەم لسەر لەشێ خویێ لاواز هێدی، هێدی، پشتا خو لسەر دوشەکا خویا تژی ژ گولێن شین ڕادکەم و بترسڤە چاڤێن خو هەمبەری وێ خودیکا هەردەم من نەفرەت لێ کرین ڤەدکەم! خەم لاوازی ئالوزی و ترس ل دێمێ من دباریت و جارەکا دی دبینم ئەز یا کرێت بوچی؟

ئەی ئەو مروڤێن هەردەم د نڤستی ژخەو ڕابن! ئەرێ ما خەوا هەوە چەندا گرانە کو سروشتێ خو ژبیر بکەن؟ ئەرێ ما ئەم ئەو نەبووین یێن خو دگەل فرینا پەڵاتینکا دهەلاڤێت، ئەم ئەو نەبووین، یێن لهیڤیا زڤستانان د ماین دا لبەر بارانێ تەر ببین لێ ئەڤرو چ؟ ئەڤرو ئەم نەوێرین ژبەر ڕەشاتیا مژیلانکێن خو ژبەر سوراتیا لێڤێن خو، ئەم دترسین!

ترس ژ پەیڤا کرێت! ئەرێ ما ئەم ئەو نەبووین یێن دەمێ ڕوژهەلاتنێ پرچا خو د دا بای دادگەڵ خو ببەت لێ ئەڤرو مودێل و ستایلان ئەو جوانی ژمە وەرگرت . ئەرێ ما گونەهە ئەز ژ خەو ڕابم و سەرێ خو بشوم و بئی هیچ ماسکەک ، پارچەکێ تەنک د بەژنا خو ب ئالینم و خو نیشا سروشتی بدەم ؟ ما ل وی دەمی ژی دا هەر یا کرێت بم؟

ئەگەر ئەز ل زەمانەک دی بام دا گەلەک یا جوانبم دا دێمێ خو فێرکەم دگەل کولیلکان ببیتە هەڤال دا دەست و پێت من دناڤ رویباران دا فێری یاریان بن ل وی دەمی کەسێ ئەو وێرەکی نەدبو باس ل کرێتیا من بکەت.

 ئەز نزانم گازندا ژ کێ بکەم ژ خودای کو ئەڤ دێمە بومن چێکری یان ژڤان، مروڤان کو هەردەم دبێژنە من تو یا کرێتی؟ تەك تشتێ ئەز دزانم ئەوە من نەڤێت ئێدی ئەز ل ڤێ ژوورێ ل ڤی تاخی ل ڤی باژێری ل ڤێ جیهانێ بم یێن هەر تشتێ وان جوان بتنێ ئەز نەبم..

تایبه‌ت به‌كولتور مه‌گه‌زین