لە پرسەی (نا) دا
نەژاد عزیز سورمێ
گۆری دوور لە مەرگ..
پەنجەرەی کراوەمان بەسەر باپێوی
وڵاتی بە مردن تـێر و بەشتیتر ناشتا
ئامرازی پـاکەوانان…
گوڵئەندام !
لە پـاڵ ئەوەی من و تۆ دەیزانین
ترسم لە ئاوی پەنگاوە
لەم ڕێیەدا ،
کە زیاتر لە ئاوەڕۆکان دەچێ
ترسم لە تیغی تازە ساوە..
لە چەپڵەی گەرمی ڕەعیەت..
لە کۆڵانە ڕووتەکانەوە بەرەو پەرستگا ،
مناڵیی نیشتمان و
نیشتمانی مناڵیمان ھەڵواسیوە …
بوونەوەری ڕەنگ داپچکوڕاوی
چاو زیت و کەمۆ
لە کەندووی بەتاڵ ئەکەن
سێ وەختەی ڕۆژێ بۆش
کاسەی سمتیان داوەتە بەرخۆر…
گۆڕی دوور لە مەرگ
ئاسوودەییەک لە پێدەشتی چاونزیی و
بەدکریڤی و
تـژی خۆھەڵخستن..
تەنگەڵانێکی بێ ھاوتا..
زڵکاوێکی خومار..
لە کۆڵانە ڕووتەکانەوە بەرەو پەرستگا
مناڵیی نیشتمان و
نیشتمانی مناڵیمان ھەڵواسیوە…
تەمووزی 1996