فۆتۆ: ده‌روێشی ته‌ریقه‌تی نه‌قشبه‌ندی و قادری زه‌رگ له‌خۆیان ده‌ده‌ن!

عه‌تا قه‌رەداخی؛ ڕیفراندۆم‌ و شكاندنی شكۆی شار!


Loading

عه‌تا قه‌ره‌داغی
دەچم بۆ شار، هەواڵی شار چیە؟ ئەو شارییە، شار شێواوە، شار شاریی تیا نەماوە، شار بووە بەژێر پێی غەیری شارییەوە. ئەمە ئەو دەربڕینانەن لە رابردووەوە تاكو ئێستاش لە سلێمانی و دەوروبەریدا بەكاردەهێنرێن  و دەبیسترێن. بەڵێ مەبەست لە شار سلێمانیە. چیرۆكنووسی ناوداری كورد حسێن عارف عەبدورەحمان كە خۆی بە كوڕی رەسەنی شارو نەوەی بابان دەزانێت یەكەم رۆمانی خۆیی لە سەرەتای هەشتاكانی سەدەی رابردوودا بە ناونیشانی”شار” بڵاوكردەوە، كە رۆمانێكە لەبارەی شارو ناوەوەی شارەوە دەدوێت. ناوبردنی سلێمانی بەشار لە خۆوە نەهاتووە، بەڵكو پەیوەندی بە مێژووی درووستبوون و سرووشتی درووستبوونی سلێمانی و بوونی بەشێك لە بنەماكانی شارەوە هەیە لەم شارەدا نەك لە ئێستادا بەڵكو لەو كاتەوە كە درووستكراوە.

تەمەنی سلێمانی 233 ساڵە، لە رووی كۆمەڵناسیەوە هێشتا شارێكی هەرزەكارە، بەڵام ئامادەبوونی لە مێژووی بچووكی كورددا ئامادەبوونێكی گەورەیە. كاتێ دەڵێین لە مێژووی بچووكی كورددا مەبەستمان ئەوەیە كە كورد هێشتا خۆی وەكو نەتەوە لە پەراوێزی مێژوودایە، چ مێژووی شارستانێتی، چ مێژووی كۆمەڵایەتی و سیاسی و كەلتووری، هۆكەشی ئاشكرایە چونكە تاكو ئێستا رۆحی گشتی كۆمەڵایەتی كوردی نەیتوانیووە گوزارشت و دەربڕین لە خۆی بكات، چونكە دەربڕینێكی لەوجۆرە تەنیا لە درووستكردنی دەوڵەتدا دەبێت. تاكو دەوڵەتیش درووست نەكات ناتوانێت بەشداری بنیادنانی شارستانێتی مرۆڤایەتی بكات و لە پەراوێزی مێژوودا دەمێنێـتەوە. مانەوەش لە پەراوێزدا خاسێتی بوویەكی بچووك یان ناتەواوە.

سلێمانی لە مێژووی بچووكی كورددا كە دەشێ بە مێژووی ناوخۆیی كوردستان ناوببرێت، شوێن و پێگەی دیاری هەبووە. ئەوە ئاشكرایە كە نزیكەی شەست ساڵی دوایی دەسەڵاتی بابان كە پایتەختەكەی سلێمانی بووە، سەرباری ململانێی ناوخۆو رۆڵی خراپی عەجەم و رۆم بۆ تووندتركردنی ململانێی نێوان براكان و لاوازكردن و رووخاندنی میرنشینەكە، بەڵام هێشتا دەسەڵاتی بابان لە پەرەسەندندا بووە تا دواجار روخێنرا. هەر لەم قۆناغەدا دوو بزاوتی گەورە لە سنوورە سلێمانی و میرنشینی باباندا سەریان هەڵداوە. یەكەمیان بزاوتی شیعری كلاسیكی كوردی لەسەر دەستی نالی و هاوەڵەكانیدا گەیشتووەتە ئاستێكی بەرز، ئەگەرچی لە رووی رەگەزە نەتەوەییەكانی كەلتوورەوە ئەو ئەزموونەی شیعری بابان كودەتا بووە بەسەر رەگەزە كوردییەكاندا. بزاوتی دووەم كە لە ناوەندی سلێمانیەوە سرۆش و هێزی تەقینەوەی وەرگرتووە، نەك هەر كوردستان بەڵكو تیشكی پرتەوی گەیشتووەتە دەرەوەی كوردستانیش. ئەویش سەرهەڵدانەوەو دەركەوتنەوەی هەردوو رێبازی تەسەوفی قادری و نەقشبەندیە. كە ئەشكرایە سلێمانی بووەتە جوگرافیای ململانێ و ناكۆكی نێوان ئەو دوو رێبازە. رێبازی قادری و رابەرەكەی لە كوردستاندا شێخ مارفی نودێ و رێبازی نەقشبەندی و نوێكەرەوەو ئاراستەكەرەكەی بەئاراستەی گیانی زەحمەتكێشان و بارگاویكردنی بە بەشێك لە رەگەزە نەتەوەییەكانی كورد كە مەوڵانا خالیدی جافی مكایەڵیە لەم شارەوەو لەسەروەختی باباندا پەرەیان سەندووەو ململانێیشیان كردووە.

ئێمە پێشتر بە دوورو درێژی لەو ململانێیە دواوین. بێجگە لە ڤاسەلیڤا و مارتن ڤان برۆنسن و هەڵكەوت حەكیم كە هەریەكەیان بە جۆرێك خەریكی ئەم بابەت بوون و زانیاری باشیشیان پێشكەش كردووە، بەڵام باسی كاریگەری ئەو ململانێیانەیان لەسەر قۆناغەكانی دواتر نەكردووە، دواتر هەندێ كەس نووسین و بۆچوونەكانی ئێمەیان دووبارە كردووەتەوە. ئێمە لە كتێبی “سلێمانی زەمینەی سەرهەڵدان و ململانێی تەسەوف”كە ساڵی 1995 نووسراوە، لە دوو گوتار دواوین، گوتاری قادری كە گوتارێكی ئاراستە بەرەو ناوەندی دەسەڵاتی ئیسلامیە، گوتاری نەقشبەندی كە گوتارێكی ئاراستە بەرەو دابڕانە لە ناوەندی دەسەڵاتی عەرەبی ئیسلامی و لەبری توانەوەی كورد لە ئیسلامدا بەرەو ئەوە دەچوو كە ئیسلام لە خزمەتی كورددا بەكاربهێنرێت ئەگەر مەولانا ناچاری بەجێهێشتنی سلێمانی نەكرایەو پەیامەكەی لەو ساتەدا بەجۆرێك زیندەبەچاڵ نەكرایە.

دیارە ململانێی نێوان قادری و نەقشبەندی لە سنووری میرنشینی باباندا سەریهەڵداوەو بەردەوامبووە.  سنووری قەڵمەڕەوی میرنشینەكەش لەو سەردەمەدا هاوتای قەڵمڕەوی دەسەڵاتی تەریقەتی قادری بووە. بەڵام قەڵمڕەوی رێبازی نەقشبەندی هەموو كوردستانی گەورەی گرتووەتەوەو لە دوای كۆچكردنی مەلانا بۆ بەغداو پاشانیش بۆ شام، ئەم رێبازە زیاتر پەرەی سەندووەو گەیشتووەتە نیشتیمانی عەرەبی و سنووری دەوڵەتی عوسمانی بڕیووەو بەرەو روسیاو پاشانیش پەلی هاوێشتووە بۆ مالیزیاو شوینَانی تریش. هۆكاری سەرەكی ئەم فراوانبوونەی رێبازی نەقشبەندیش یەكەم پەیوەندی بە پرینسیپی رێبازەكەوە هەیە كە بریتیە لە كۆكردنەوەی دین و دنیا پێكەوە. دووەم لەبەرئەوەی رێبازی كاسبكاران و زەحمەتكێشان و بەشی خوارەوەی كۆمەڵگەیە واتە رێبازی خەڵكە. سێیەم پشتی بە درەختی بنەماڵەو گەڕانەوە بۆ پێغەمبەری ئیسلام و كچەزاكانی نەبەستووە. لەپاڵ هەموو ئەمانەشدا كەسێتی كاریزمی مەولانا خالید رۆڵی دیارو لەبەرچاوی بینیووە لە بەخێرایی بڵاوبوونەوەی رێبازەكەیدا.

ئێمە پێشتر لە باسكردنی ناكۆكی و ململانێی نێوان یەكێتی و پارتیدا لە دوای شكستی 1975 و ململانێی پێشتری نێوان جەلالی و مەلایی لە شەستەكانەوە، وای بۆچووین كە یەكێك لە هۆكارەكانی ئەو ناكۆكیە بێ كۆتاییە دەگەڕێتەوە بۆ ململانێ و ناكۆكی نێوان رێبازی قادری و رێبازی نەقشبەندی. نەگەیشتنی ئەم دوولایەنەش بە هیچ چارەسەرێكی ریشەی هەر لە ساڵی 1964 بەدواوە تاوەكو ئەم چركەساتە، پەیوەندی بە ناكۆكی نێوان ئەو دوو رێبازەوە هەیە. بنەماڵەی بارزانی شوێنكەوتووی رێبازی نەقشبەندین و بنەماڵەی تاڵەبانیش لە مێژوویەكی كۆنەوە بوونەتە شوێنكەوتووی رێبازی قادری. هەرچەندە تاڵەبانی تیرەیەكی سەربە عەشیرەتی گەورەی زەنگەنەن، بەڵام لەرێگای وەرگرتنی تەسەوفەوی قادرییەوە بوونەتە شێخی بەرماڵ و شوێنكەوتووی راستەقینە و شوێن و پێگە دیاری رێبازی قادری بوون و تەكێی تاڵەبانی هاوشانی تەكێكانی تری قادری، بە تایبەتی تەكێی شێخانی سلێمانی و قادركەرەم و كەس نەزان و شێخانی هیران و چوێسەو…تاد” بەردەوام ئاوەدان و دیارو پێگەبەرزبووە.

لە مێژووی دیاری بزووتنەوەكانی كورددا هەردوو رێبازەكە بە شێوەی جیاواز سەركردایەتی بزووتنەوەی كوردایەتیان كردووە. دیارترینی ئەو سەركردانەی سەربە رێبازی قادری كە رۆڵی دیارو كاریگەرییان بینیووە، شێخ مەحمودی حەفیدزادەیە لە نەوەی شێخ مارفی نۆدێ و مام جەلال تاڵەبانیە كە لە عەشیرەتی تاڵەبانی سەربە رێبازی قادریە. لەو سەركردانەشی كە سەربە ڕێبازی نەقشبەندیبوون و هەریەكە لە قۆناغێكدا سەركردایەتی بەشێك لە بزووتنەوەی كوردایەتیان كردووە بریتین لە شێخ عوبەیدوڵای نەهری، شێخ عەبدولسلامی بارزانی، شێخ عەبدولقادری شەمزینی، شێخ سەعیدی پیران، سەید رەزای دەرسیم، ملا مستەفای بارزانی، مەسعود بارزانی.

ۆتۆ: ده‌روێشی ته‌ریقه‌تی نه‌قشبه‌ندی و قادری له‌كاتی زیكر و زه‌رگ له‌خۆداندا

جێ نفوزی بزووتنەوەكانی شێخ مەحمودی حەفیدو مام جەلال زیاتر سنووری قەڵەمڕەوی میرنشینی بابان و رێبازی قادری بووە. جێ نفوزی رابەرانی سەربە رێبازی نەقشبەندی فراوانتر بووەو بە تایبەتی رووبەری فراوانتری كوردستانی گرتووەتەوە، لە باشوورو باكورو تەنانەت رۆژهەڵاتیش بە هەمان شێوەی نفوزو قەڵمڕەوی رێبازی نەقشبەندی. ئێستا ئەو پرسیارە سەرهەڵدەدات ئایا لەو ریفراندۆمەی كە بڕیارە لە كۆتایی مانگی ئەیلولدا بكرێت، دەشێ ئەو پاشخانە مێژووییە رۆڵ و كاریگەری هەبێـت لەسەر شێوەو ئاستی بەشداریكردن و دانگدان تیایدا؟

ئایا بە گوێرەی سلێمانی و قەڵەمڕەوی بابان و رێبازی قادری كە ئێستا بە پلەی یەكەم جێ نفوزی یەكێتی نیشتیمانی و بزووتنەوەی گۆڕانەو ئەم دووانەش هەردووكیان لە بنیادو سروووشتی پێكهاتن و دیدو روانینی دووریاندا هەمان شتن، جیاوازی نێوان یەكێتی نیشتیمانی و بزووتنەوەی گۆڕان هاوشێوەی جیاوازی نێوان تەكێكانی شێخانی سلێمانی و شێخانی قادركەرەم و شێخانی كەسنەزان و  شێخانی هیران و شێخانی چوێسەیە. ئایا لەم زەمینەیەدا كە لە ژێر هەژموونی گوتاری قادریدایە، كە گوتارێكە پەیوەست بە ناوەندی دەسەڵاتی ئیسلامیەوە كە لەسەردەمی میرنشینی باباندا ئەو ناوەندە پایتەختی عوسمانی بوو، ئێستاش ئەو پایتەختانەیە كە نوێنەرایەتی ئیسلام دەكەن كوردستانیان داگیركردووە، ئەگەرچی ئێستا ئیسلامیبوونەكە كەوتووەتە خزمەتی ناسیونالیستی نەتەوەكانی ئەو دەوڵەتانەوە. بە گوێرەی باشووری كوردستانیش مەبەست دەوڵەتی عەرەبی ئیسلامی عێراقە. ئایا لەم ریفراندۆمەدا كە مەبەست بیستنی دەنگی كوردە بۆ دابڕان لەو ناوەندە، ئاستی دەنگدان چۆن دەبێت؟ ئاشكرایە ئەو دەنگدانە تەنانەت ئەگەر كار بە ئەنجامەكەی بكرێت یان نەكرێت یەكەمین جارە، كورد بە دەنگی خۆی بڕیاری چارەنووسی خۆی بۆ دابڕان یان بۆ مانەوە بدات. ئایا رێژەی بەشداری و دەنگی بەڵێ لەم شارەدا چۆن دەبێت؟ بە تایبەتی ئەوە ئاشكرایە سلێمانی كە مێژووەكەی نزیكەی 233 ساڵە، وەكو پێشەنگی كوردایەتی و رۆشنبیری و پێشكەوتن لە كوردستاندا سەیر دەكرێت. هەربەو پێیەش دەبێ هەست و هوشیاری نەتەوەیی لەم شارەدا لە شوێنەكانی تری كوردستان گەشەسەندوتر بێت و، دەبێ ئێستا لەم شارەدا بزووتنەوەیەكی ناسیونالیزمی هێند بەهێز هەبێت كە رابەرایەتی هەموو گەلی كوردو كوردستان بكات بە ئاراستەی سەربەخۆیی و پێكهێنانی دەوڵەتی نەتەوەیی. ئەمەش مانای دابڕانە لەو ناوەندەی دەسەڵاتی ئەوانی تر بەسەر كورددا. ئەگەر لە روانگەی مێژوویی و، پاشخانی ئامادەبوونی ئەم شارەوە سەیر بكەین دەبێ جەماوەری خەڵك بێ ئەوەی چاوەڕوانی گوتاری سیاسی حیزب و رێكخراوە سیاسیەكان بكات خۆی  وەكو بزووتنەوەیەكی ناسیونالیستی و هەڵگری گوتاری ناسیونالیزم رابەرایەتی هەموو جەماوەری خەڵكی كوردستان بكات بۆ سەربەخۆیی و پێكهێنانی دەوڵەت. بەڵام ئایا لە راستیدا ئێستا سلێمانی بەم جۆرەیە؟ ئایا رابەرایەتی گوتاری ناسیونالیزمی كوردی لێرەوە دەكرێت؟ ئایا ئەوە ئێمەین، لێرەوە لە سلێمانی هەڵگری پرۆژەی سەربەخۆیی و درووستكردنی دەوڵەتین، یان ئەسڵەن شتێك لەم شارەوە نابینرێت بە ناوی پرۆژەی سەربەخۆیی و دەوڵەت؟ كەواتە با بپرسین هۆكارەكە چیە؟ ئایا گرفت لە جەماوەرو خەڵكی شارو قەڵەمڕەوی بابان و  جێ هەژموونی رێبازی قادریە؟ یان كێشەكە گوتاری سیاسی و كەلتووری و عەقڵی لوتكەی هەرەمی حیزبی و دەسەڵاتی ئەم رووبەرەیە؟ بۆچی دەنگی لایەنگری پێكەوەژیان لەگەڵ عێراقی شیعەو مانەوە لەچوارچێوەی عێراقدا لەم شارە پێشەنگەوە زیاتر دەبیسترێت لەچاو شوێنەكانی تری كوردستان؟ ئایا بۆچی دەنگی داخوازی سەربەخۆیی و دەنگی لایەنگری بۆ پێكهێانی دەوڵەت لەم شارە پێشەنگەوە لە هەموو شوێنەكانی تری كوردستان نزمترو كزترە؟ ئایا بۆچی دەنگی دژایەتیكردنی ریفراندۆم و باسكردنی سەربەخۆیی و درووستكردنی دەوڵەتی كوردی لەم شارەوە بەرزتر لە شوێنەكانی تری كوردستان دەبیسترێت؟ ئایا بۆچی زۆرێك لە رۆژنامەو ماڵپەڕو رۆژنامەنووس و كەناڵە تەلەفیزیۆنیەكانی ئەم شارو رووبەرەو نووسەرانی سیاسی ئەم جوگرافیایە بە مایكرۆسكۆپ بە دوای ئەوەدا دەگەڕێن كە راوبۆچوونی شۆڤێنیستە عەرەب و ئاخوندە ئێرانیەكان و كەمالیستە دەست سوورەكان بەخوێنی كورد بهێننەوە، كە چۆن دژایەتی سەربەخۆیی كوردستان دەكەن. چۆن دەگەڕێن بە دوای رای رۆژنامەنووس یان توێژەرێكی نائینسان و بێ ویژدانی هەستنەكردوو بە ئازارەكانی كورد كە دەشێ بەكرێگیراوی عەرەب یان تورك و فارس بێت و راپووچەكانی ئەوان بە دژی داخوازییەكانی كورد دەدەن بە گوێی هاووڵاتیانی سادەو داماوی كورددا، بۆ ئەوەی بە هاووڵاتیانی سادەی كورد بڵێن دەنگدان لە ریفراندۆمدا ترسناكە، خیانەت و ناپاكیەو ماستاوچێتی و كۆیلەێتیە بۆ بنەماڵەی بارزانیی. ئاخر با بپرسین ئەمە چ عەقڵێكە كە خۆی بە شۆڕشگێڕو ئازادیخوازو سەربەخۆیی خوازو سۆشیال دیموكرات و گۆڕانخواز بزانێت و بە هەزاران كوڕی فەقیرو هەژاری میللەتی بە شەهیدبوون دابێت، كەچی سەروەری داخوازیكردن و كاركردن بۆ ریفراندۆم و سەربەخۆیی ببەخشێت بە بنەماڵەو حیزبێك كە ئەم خۆی نیوسەدە زیاترە دژایەتی دەكات؟؟؟. ئایا بانگەشەكەرانی بۆچوون و تێڕوانینی دژ بە ریفراندۆم لە كوێی بەرژەوەندییەكانی كورددا وەستاون؟ من حەقم بەوەوە نیە كە داخۆ ئەوەی ئێستا لە كوردستان باسی ریفراندۆم و سەربەخۆیی دەكات بە دڵمە یان نا، چاوەڕوانی ئەوەی لێ دەكەم سیستێمێكی بەڕێوەبردنی باش درووست بكات یان نا، بە نوێنەرو تەنانە بە دڵسۆزی گەلی دەزانم یان نا. هەرچەندە دەزانم كاتی قسەكردن لەسەر ئەم پرسیارانەش دێت.  بەڵكو مەبەستم ئەوەیە كە ئەم پرسیارە واقیعیە لە خۆمان بكەین: ئایا كورد مافی ریفراندۆم و سەربەخۆیی هەیە یان نا؟ بێگومان ئەم پرسیارە پێویستی بە وەڵامدانەوە نیە چونكە وەڵامەكەی ئاشكرایە. كەواتە بۆچی ئەو هەموو بیانوو پاساوە دەهێنرێـتەوە بۆ دژایەتیكردنی سەربەخۆیی و پێكهێنانی دەوڵەتی كوردی. ئەگەر مەسەلەكە لەبەرئەوەیە كە پارتی و مەسعود بارزانی داوای ئەوە دەكەن و وەكو پرۆژەی ئەوانی لێهاتووە، ئەوە دەبێ ئێمەی سنووری سەوزو نیلی، ئێمەی سنووری قەڵەمڕەوی بابان و تەریقەتی قادری سەرزەنشتی خۆمان بكەین و شەرممان لەخۆمان بێت، ئەوە لە بچووكی و هیچ لە بارانەبوویی ئێمەیە كە هەموو شتێك كەوتووەتە دەستی پارتی و بارزانی. ئەی مام جەلال و كاك نەوشیروان چەندین جار نەیاندەگوتەوە لە راپەڕیندا نێچیرڤان بارزانی بە خۆی و سیانزە كەسەوە هاتەوە، ئەی پێم ناڵێن چۆن بەو سیانزە كەسەوە ئاوا بوون بە خاوەنی بڕیارو دەسەڵاتیان بەسەر كوردستاندا سەپاند؟ ئایا ئەوە لێزانی ئەوان درووستی كرد یان نەزانینی ئێوە؟ ئایا ئەوە دەرئەنجامی ململانێی جەلالی و مەلاییە، یان سێبەری ململانێی نێوان گوتاری قادری و نەقشبەندیە؟ یان لاوازی هەستی نەتەوەیی دانیشتوانی ئەم رووبەرەیە؟ بێگومان ئەوە لاوازی هەموو سەرەكانی ئەم لایە نەك لاوازی هەستی نەتەوەیی و نیشتیمانی جەماوەری خەڵكی ئەم رووبەرە. بەڵكو بە پێچەوانەوە خەڵكی خۆڕاگرو خەباتگێڕی ئەم رووبەرەی ئێمە قوربانی دەستی لاوازی سەرەكانیەتی كە لە پێناوی بەرژەوەندیە تایبەتیەكانی خۆیاندا، لە ئەنجامی لاوازی و هیچ لە بارانەبوویاندا شكۆی جەماوەری ئەم رووبەرەیان شكاند، ئەو جەماوەرەی كە بەعس نەیتوانی شكۆیان بشكێنێت. ئێستاش دەیانەوێت بۆ مەرامی سیاسی خۆیان و بۆ رقی دوورو درێژی دووسەد ساڵی ئەو مێژووەی باسمان كرد، وا لە جەماوەر بكەن دژی ریفراندۆم و دژی سەربەخۆیی هەڵوێست وەربگرێت بۆ ئەوەی شكۆی نەتەوەییبوون و شكۆیی خەبات و خۆڕاگری دوورو درێژو لە نەبەزین نەهاتوو لە جەماوەری ئەم دەڤەرە بسەننەوە.

ئەگەر ئێمە بەراستی بڕوامان بە كوردو بە ئایندەی كوردستان هەیە ، ئەگەر بڕوامان بە سەربەخۆیی و درووستبوونی دەوڵەتی كوردی هەیە، كەس دەستی نەبەستووین، با بە كردار خۆمان بكەین بە خاوەنی پرۆژەی ریفراندۆم و سەربەخۆیی و بە پرۆژەی جدیتر بۆ سەربەخۆیی و بۆ درووستكردنی دەوڵەتی كوردی كێبڕكێی پارتی و بنەماڵەی بارزانی بكەین. بەڵام راستیەكەی ئەوەیە كە مللانێكە هێشتا لە سێبەری ماملانێ و ناكۆكی نێوان رێبازی قادری و نەقشبەندی، جەلالی و مەلاییدایە. سنووری ئەملا هەڵگری گوتاری قادری و جەلالیە، ئەولاش هەڵگری گوتاری نەقشبەندیە. پێكەوەژیانی ئەم دوو گوتارەش تاكو ئێستا جۆرێكە لە وەهم. لەم روانگەیەشەوە ئەگەر ئەم بۆچوونە لە جێگای خۆیدا بێت ئاراستەی كاركردن بۆ مانەوە لە سنووری گوتاری عێراقیدا كە هاوشێوەی گوتاری مانەوەیە لە چەقی دەسەڵاتی ئیسلامی سەردەمی رێبازی قادریدا، ئەوا مانای وایە گوتاری باڵادەست جێگیرەو هەمان شێ,ەی رابردوو كاردەكات و بەو پێیەو لەژێر ئەو كاریگەرییەدا دەنگ و لایەنگری بۆ مانەوە لەپاڵ عێراقدا دەنگێكی بیستراو و دیار دەبێت. ئەوەش هۆكاری سەرەكیە بۆ ئەوەی هەر لە ئێستاوە لە وتارو لە كرداری راگەیاندن و رۆژنامەنووس و نووسەران و سیاسیەكانی ئەملادا بە ئاشكرا بانگەشەی بەشدارینەكردن لە ریفراندۆمدا و دەنگدان بە نەخێر ببیسترێت.

كەواتە سەرباری ئەو هەموو قسەو كۆبوونەوانەی لەسەر ئاساییكردنەوەی باروودۆخی ناوخۆی كوردستان دەكرێت، من پێموایە ئەوەی لە كۆنەستی جەماوەری سادەی جێ قەڵەمڕەوی قادری و بابان و سەوز نیلیدا هەوڵی جێگیركردنی دەدرێت، هێزو هەژموونی گوتاری رێبازی قادریە و ئەویش بە ئاراستەی ناوەندی دەسەڵاتی ئیسلامیە كە لە ئێستادا دەسەڵاتی ئەوی عەرەبی عێراقە بە گوێرەی كورد. بۆیە چاوەڕوانكردنی ئەوەی كە لەم قەڵەمڕەوەدا و لەم قۆناغەدا كە هێشتا ناسیونالیزم نەبووتە بزووتنەوەیەكی كۆمەڵایەتی ئەوتۆ كە هەموو دەسەڵاتە لۆكاڵیەكانی وەكو دەسەڵاتی خێل و عەشیرەت و بنەماڵەو رێبازی تەسەوف وحیزب رابماڵێت، ئەگەری چاوەڕوانكراو ئەوەیە كە ریفراندۆم و مەسەلەی سەربەخۆیی و جیابوونەوە لە عێراقی عەرەبی لە قەڵەمڕەوی بابان و لە قەڵمڕەوی تەریقەتی قادریدا دەنگێك بەدەست نەهێنێت كە لە ئاستی ئەو ناوبانگ و مێژووی بەرخوردانەدا بێت كە خەڵكی سلێمانی و قەڵەمڕەوی بابان و جێ نفوزی قادری و زەمینەی خەباتی یەكێتی نیشتیمانی لە ماوەی رابردوودا داویانە. ئەمەش سەرئەنجام دەبێتە جۆرێك لە شكاندنی شكۆمەندی شارو چیتر بوار بۆ ئەو شانازی پێوەكردنە ناهێڵێتەوە كە تاكو ئێستا هەموومان خۆمانی پێوە رادەوەشێنین و شانازی پێوەدەكەین. چونكە لوتكەی خەباتی كوردایەتی ئێستا گەیشتووەتە ئەوەی كە ریفراندۆم بكرێت لە پێناوی سەربەخۆیدا، باشە ئەگەر ئەم شارەو ئەم قەڵەمڕەوە بۆ سەربەخۆیی دەنگ لە شوێنەكانی تری كوردستان كەمتر بهێنێت، ئیتر بەچ هێزو پاشخانێكەوە خۆمان بە پێشەنگ بزانین و شانازی بە كام شكۆمەندییەوە بكەین؟؟؟ ئایا لە بارێكی وەهادا كێ بەرپرسیار دەبێت لە شكاندنی شكۆمەندی شار؟ ئەو حیزبانەی كە خاوەن نفوزی ئەم رووبەرن و جێنشینی عەرشی بابانن و لەژێركاریگەری و هەژموونی گوتاری قادریدان، یان جەماوەری سادەی خەڵك كە ئەوانی دەسەڵات و حیزب بە دوو جۆر دەیخەنە شوێنی دەروێشانی ئەوسای تەكێی قادری. یەكەم بە برسی كردن و خراپ بەڕێوەبردنیان. دووەم بە كۆنترۆڵكردنی عەقڵ و مێشكیان هەرچۆن شێخ كۆنترۆڵی مێشك و عەقڵی دەروێشانی دەكردو دەكات، ئەویش لە رێگای پەروەردەكردنی حیزبی و راگەیاندن و نووسین و قسەكردنی نوخبەیەك لە رۆشنبیری حیزبی و پاشكۆحیزبی و هەڵوێستی ناجێگیرو دژبەیەكی بەردەوامی بەشێك لە بەرپرسانی ئێرەوە.

بێگومان ئاشكرایە ئەگەر ریفراندۆم بكرێت، بەشی ئەوە دەنگ بەدەست دەهێنێت كە پێی بگوترێت سەركەوتن. گومانم لەوە نیە كە هەرچۆن ئێستا پارتی زۆر بە ئاسانی بەشێك لەبەرپرسانی ئەم دەڤەرەی ئەملا كە گۆرانی بە باڵای شیعەو عێراقدا دەڵێن وەكو ناپاك و بەكرێگیراوی بێگانە نمایش دەكات، دواترو ئەگەر رێژەی دەنگدان لە جوگرافیای سەوز نیلیدا بەرێژیەكی ئاشكرا كەمتر بێت لە جوگرافیای زەرد، پارتی ئەوە لە خزمەتی خۆیدا بەكاردەهێنێت و ئەوسا وێنەكە بۆ جیاكردنەوەی لایەنگرانی سەربەخۆیی و دژایەتیكەرانی سەربەخۆیی ئاسانترو ئاشكراتر بۆ ئەو بەرجەستە دەكرێت و رەنگە ئەوەش ببێـتە هۆی زیاتر پەراوێزخستن و بە پەراوێزبوونی قەڵەمڕەوی بابان و جێ نفوزی رێبازی قادری و جوگرافیای سەوزنیلی.

ته‌واو
سه‌رچاوه‌؛ شار پرێس
http://www.sharpress.net/op-detail.aspx?jimare=89880#.WU380pZ6Bks.facebook