Wreckers_Coast_of_Northumberland_Joseph_Mallord_William_Turner

درزێک کەوتۆتە بەلەمەکەم

 280 جار خوێنراوه‌ته‌وه

بوخاری هوشيار

درزێک کەوتۆتە بەلەمەکەم

شیعری: بوخاری وشیار

 

 

 

لەنێو مندا

بەلەمێک دەمێکە بەڕێگاوەیە

کێ ناڵێ لە کەنار ون نەبووە

کەس نازانێ

منیش بێ ئاگا لەوەی

درزێک بە درێژایی زەمەن

کەوتۆتە جەستەی بەلەمەکەم و

چارەنووسیش ئاو دەیزانێ..

 

Wreckers_Coast_of_Northumberland_Joseph_Mallord_William_Turner

دەبێ کەمێک باسی خۆم بکەم

کە بە ئەندازەی دڵی کۆترەباریکەیەک

دڵە کوتە دەگرم

دەمێک لە پەنجەرەوە

سەرنجە ساویلکەکەم

دەکەوێتە سەر کاپتنێک سەرخۆش

بە ئاوازی ئاو

کەناری پەنجەرەکە بۆ من

جێگای تێڕامانە

لە زەردەپەڕی ئێواران و

کۆمەڵێک لەو شتە دووبارانەی

کە ناویان ناهێنم

دەزانم چۆن بە چیڕۆکی سارد

خراپ هەڵدەلەرزم

بۆیە با واز لە چیرۆک بێنین

باشترە بڵێم:

لە نێوان دوو چرکەی پووچدا

دێم و دەچم

لەم هات و چوونەمدا

شتێکم لێ ون بوو

وابزانم نەخشەی دێرینی دەریا بوو

خێرا کەوتە ئاوەکەوە و

خراپ شەو داهات

 

بیرم نەچێت

پشیلەیەکم هەبوو

ئەوکاتەی مرد

لە کەنار بیرەوەرییەکی چۆڵدا

تلیاکم دەکێشا

یارییەکانی منداڵیم بە گەڕەکدا

پەرش و بڵاو دەکردەوە

ئەو مێشکەی من زۆر خراپە

Wreckers Coast of Northumberland, c. 1836, oil on canvas,

دووبارە بیرم نەبوو

چاوەڕوانی لە پەنا گۆڕێکی سارددا

چەندە یارییەکی بێ مانایە

 

چەند ساڵ بەر لەم ئێوارەیە دەمگووت:

بەلەمێک لە دار چنار درووست دەکەم و

دەیخەمە نێو دڵی دەریاوە

بێ ئاوڕدانەوە لە پشیلە و کۆتر و پەنجەرە

پشت دەکەمە ئەم شارە تەنگە و

دوور دەکەومەوە

نازانم بۆ نەمکرد

 

ئێستا بیر لەوە دەکەمەوە بڵێم:

دەبێ لە بیابانی سینادا بخنکێم

خراپ دڵم لە دەریا تۆراوە..


تایبه‌ت به‌ كولتور مه‌گه‌زین – بیروڕاكانی بابه‌ت و ڕێنوس خاڵبه‌ندی تایبه‌ته‌ به‌نوسه‌ر خۆی. كولتور مه‌گه‌زین. ته‌نها دانانی لینكی بابه‌ت ڕێگه‌پێدراوه‌. هه‌موو په‌ره‌گرافێك و پۆستكردنێك بێ دانانی لینك و ناوی نوسه‌ر و گۆڤاره‌كه‌ دژی یاسای كۆپی ڕایته‌ و لێپێچینه‌وه‌ی یاسایی له‌ دوایه‌. ‌

 

 

تابلۆکان؛ ولیەم تێرنەر، نیگارکێشی بریتانی` ١٧٧٥ - ١٨٥١`   دووتابلۆ لەسەر هەمان بابەت؛ 

١. ولیەم تێرنەر؛ تێکشکانی بەلەمێک  لەسەر کەنارەکانی نۆرسەمبرنلاند. 

٢.ولیەم تێرنەر؛ تێکشکانی بەلەمێک، لەسەر کەنارەکانی نۆرسەمبرنلاند ١٨٣٦.