خانمەکە ل سەر عەرشێ پەیڤان برێڤەدچت
لەشێ دەریایێ فێردکتە ھەمبێزا ئا گری
ئاگر ڤەدگەرت بەحسێ سۆرترین شەڤا خوە دکت
وەھمەکە ب لەشێ بۆشاییێ ڤەدچت،
ب ھەمی رەنگان دبتە بێھنا باوەشەکا گەرم و
ژ نیشکانڤە د ئاڤریەکا تەزی دا مالق دبت و
گەرم شوین پێن خوە ل سەر ئەنیا خەیالێ دھێلت
سەلوا شەڤە و دەستپێکا چێبوونێ یە
نەمانە و خوە ھاڤێتنا ناڤ مانێ یە
گڤاشتنا دەمیە ژبۆ دلۆپەکا تژی جە
شلبوونا رحێ یە ژبۆ سیتافکەکا تژی مرۆڤ
سیھا ئاڤێ یە ژ ئەورەکێ زەر و
ژ رەھندێ رامانان کەسک دوریێتە ناڤ پاخلێن ئێشانێ
ل ھنداڤ بەژنا ھاتنێ دبتە مانشێتەکا گەرم,
سار, د تاڕماییەکێ دا رۆناھیێ ڤەدخۆت و
تەمەنەکی دخەودچت رێنڤێسا مزگینیەکێ
مزگینی ژ سەلوایێ سپێدەھیا کولیکێن ھنارایە بەرەڤ کنارێ ئەزەلێ,
نوحێ پەیڤاپە و دێ ھەموو چیان د بەرگەکی دا کتە شعر
شعرەکە دێ ئاشتیێ د رحا زیندانێ دا پەقینت
زیندانەکە دێ رحێ بترسا مرنێ ڤەژینت
مرنەکە دێ ھاتنێ د چوونێ دا ئینت
چوون, سەرھاتیا مرۆڤەکێ کەسکە, دبێژت: تفنەکە ب چ جەنگانڤە, دێ رۆندک ب چاڤێن تەناھیێ دا ھێنەخوار. شەڤێ ب بێرامانی دەستڤەنەدە, دێ تەزینک لەشێ ئەلندێ ھنگێڤن. مرۆڤەکە ھەموو شەڤان چیرۆکەکێ دوبارەدکت: (( بلندی یا من, خوە ھاڤێتنە بۆ ناڤ نزماتییا وێ)), ببینە وێ, نە ژبەرکو دا بزانی ئەو چیە دبێژنێ مێ, دا کو بزانی, ژ کەنگی وەرە خەلەتە بێژنە ئەوا ل بن پێن تە رێ؟
بمرە… سەلوا بمرە…
ئەز دێ ھێدی ھێدی ھێمەئێک و د مرۆڤێ دەستپێکێ دا وەریێم ئاخ
بمرە…سەلوا بمرە…
ئاخ دێ باژێرێ زیندیبوونا ئێڤاریێن تە راگەھینت
بمرە…سەلوا بمرە…
سییبەر دێ زانت چەوا بێ رۆناھی ھەبت؟
بمرە… سەلوا بمرە…
ئەز دێ زانم ب قێرینا لێبۆرینێن کیژ دەریایێ گازی بکم؟
سولوااا… بمرە…! بمرە…! بمرە…!
پێن خوە د پەیڤەکێ دھەلینت و بەرزدبت…
گاتایەک شویندبت: من بخوینن ئەز پێخەمبەرا سرۆشتیمە
خوە د ڤەخۆتە ناڤ تاریەکێ و ب داڤەکا کەنیا دا دھێت و دچت:
ئەز بیڤەلەرزا بێدەنگا ب رۆناھی مە
گرنژینەکە و ژ دەڤێ خەنجەرێ دکەڤت:
ھەموو ئەز جەنگم, تژی کوترەکا سپیمە
ژ ناڤ پورتریتێ خوینمێژەکی دەردکەڤت:
ئەز زڤرۆکەکم, سۆرەکێ تژی ئاشتیمە
مرۆڤەکم,
بۆ پێنگا ڤەکێ رەھەنەکی رادئێخم
رەھەندەکم،
بۆ فرینەکێ پێنگاڤەکێ تێکدئالزینم
ئالزینەکم,
بۆ ھەرمانێ
پرسیارەکێ ژ بۆ وە ل سەر لێڤێن خوە دنەخشینم.
***
سەلوا
رووبارەکە, نازڤرتە کانیکا خوە
کانیکەکە، ناپەقت ژ ڤیانا خوە
ڤیانەکە، نارژتە ناڤ برینا خوە
برینەکە، گوە نادتە دەنگێ خوە
دەنگەکە, پشت دتە جزریێ خوە
جزیرییە، سەلوایێ دنڤێست
پێنگاڤ ژبۆ برێڤەچوونا وەلاتێ خوە
جزریری…
لەشێ وی یێ بوویە پەیڤەکا ژ رەڤێ ڤەگەریای و
ژ سارمایا بەندەمانێ پەق پەق
و ھێشتا ب دلپێڤەبوون دبێژت:
(( سلوی دائما علی حق))
سەلوا جارەکێ دھێت و ناھێت
لێ نزانم بۆچی ل ھەموو جارێن دی
دەم ژ پێژنا گاڤێن وێ دھێت
٢٣ ئازاری ٢٠١٤
