ئارمانج گوهەرزی؛ گەر ئەز مەلا بام

Loading

دا ئەڤ گوتارا من بیت

14112045_596726757168683_2009237943_n
ئارمانج گوهەرزی

ب ناڤێ یەزدانێ کەونی.

خووشک و برایێن مروڤدۆست نە موسلمان ب تەنێ!

گەلۆ، ئەو کەسێن نھا ل بەر سینگێ من ئامادە و ھندەک ژ دەمێ خوە یێ زێرین کوشتین.

گۆتارا ئەڤرۆ دێ ل سەر رەوشا نھا و ریالزما نھا و مرۆڤێ نھا بیت، ژبەرکو “دین” نەھاتییە خوارێ دا مرۆڤ ژێرا ببیتە خزمەتکار بەلکو ھاتییە دا پتر خزمەتا مرۆڤاێەتییێ بکەت و پێشبێخیت و ئەو د خزمەتا مرۆڤایەتییێ دا بیت …

لەورا ئەز باس ل ئەبو ھورەیرە، ئیمام عەلی و عومەر و فلان و بێڤانان ناکەم. چمکو ھەر دینەکی، ئوولەکی دوراتییەکێ یان ھەڤدژییەکێ بێخیتە ناڤبەینا خوە و ریالزمێ تێدا دژیت، یانی گوھارتنا سەردەمیانە بۆ تێکستی نەکەت ژ بوونا کو ب ژیواری ڤە گرێبدەت. ژبلی دەرچوون ژ پەیاما وێ کومەلگەھەکا دەمارگیر و تاکەکێ ھشک باوەر و توند ژی چێکەت.

یانی باپیرێ من ل بەرێ دا چکرییە و چ بوو، نە گرنگە، گرنگ ئەوە ئەز چمە و دێ شێم چکەم؟ ل ژێر ڤێ فەلسەفێ گەرەکە کار بکەین و خوە پەروەڕدەکەین. ل سەر ڤێ شێوێ ھزرکرنێ و فێمکرنێ وێ ھەم کومەلگەھـ بەرف پێش بچیت ھەم ژی ئوول جھێ خوە وەک پەیامەکا ھەرتم د نوو بوونێ دا بگریت.

لەورا جاردن دبێژیم گەلۆ، خووشک و برایێن مروڤدوست . نە بتنێ مسلمان.

ئیرۆ حەرامبوون نە گوشتێ بەرازی یە، بەلکو دزینا مالێ ھەژار و ستەملێکریێن ڤی گەلێ بندەستە.

مروڤێن پیس نە ئەون یێن مەشروبی ڤەدخوون مەست دبن بو بێھنەکێ ژ ئیش و ژانێن ژیانێ دووردکەڤن. بەلکو ئەو کەسن یێن دوروو، نھا ل پشت من خوە د چەمین و ئیڤاری ژی وەکی حەفتیارەکێ برسی ل بەندا خارنا مالێ ھەژارەکینە.

ئیرۆ جیھادا مەزن ئەوە تو نەزانەکی زانا بکەی، ھشیار بکەی، گەندەلەکی رسوا بکەی. ل ھەمبەر مافێ خوە، مافێ جیرانێ خوە، گەلێ خوە و تەڤ مرۆڤایەتییێ خەودان ھەلویست و دەنگ بی، نەک ل کونجا مزگەفتێ دگەل ھەمییان دەستێن خوە بلند کەی و دعایەکێ بکەی و دەما دەرکەتی ژی حەتا حەفت روژێن دن ژنوو ئەز جاردن ل بیرا تە بینم کو ھەلویست وەرگرتن چییە و بوچییە.

ئیرۆ ل جەم یەزدانی نڤێژ و رۆژی و چوونا کەعبێ نە ھند گرنگە ، بەلکو ھەول و پێکولکرن ژبۆ رزگارکرنا تەڤ مروڤاتییێ کو نھا تووشی کارەساتێن خویناوی و قرکرنێ بوویە گرنگ و پر ھێژایە، ژبەرکو د بنگەھ دا مەرەم ژ ڤان ئەرکێن ئوولی ب خوە خزمەت و خوە ب پارچەک زانینە ل ھەمبەر رحا مروڤێن ستەملێکری و ھەژاران نەک مەلاقی کرنە ژبۆ خوەدێ.

برا و خووشکێن مرۆڤدوست. ئیرۆ یەزدان نە ل ئەسمانایە بەلکو د ناڤ دل و وژدانا ھەر کەسەکێ دایە. ئیرۆ ئیمان و باوەرییا ب ھێز ئەوە تو بێژی “نەخێر” ژبۆ ڤێ دەسەلاتا گەندەل و ڤان کەسێن ل سەر خوینا ڤی گەلی بووینە ئەژدەھار، نە ئەوە تو بزانی کی خەلیفە کی ئەسحابی چ کرییە و چ گوتییە؟ یان ناڤێن یەزدانی چەندن؟ یان سەرا ھزر و بیرێن ژ یێن تە جوداتر بکەڤییە د چەپەرێ شەری دا داکو خوە ل پێشچاڤێن خەلکی مسلمانەکێ عەیار ٢٤ نیشان بدەی. ئەڤە جەھالەت و نەزانینە و تێگەھشتنەکا کلاسیکانەیا بەرتەنگا ئوولی یە، ژبلی دکەڤیتە د خانا مەلاقییێ دا ژبۆ خوەدێ. کو خوەدێ ژی نەفرەت ل ڤێ دوروویێ کرییە.

ئەی خەلکینۆ، “کافر” نە ئەو کەسە یێ ژ دینی دوور! نە روژی و نە نڤێژ. بەلکو ئەو کەسە یێ ب کێلەکا منڤە ل رێزا ئیکێ و بەری ھەمییان دھێتە مزگەفتێ! لێ ل ھەمبەر کەسەکێ نەمسلمانان ھندی مسقالەکێ رەحم د دلی دا نەبیت و خوینا وی حەلال بکەت.

ئەی برا و خووشکێن مرۆڤدوست، نەھێنە مزگەفتێ و دەست ژ ھەمی ئەرکێن ئوولی بەردن ژ پێناڤێ رزگارکرنا ڤێ رەوشا خویناوی کو ئیرۆ مروڤایەتی کەتییێ، ل روژھەلاتێ و تەڤ جیھانێ حەتا ب داوی دھێت مەزنترین و ھێژاترین عبادەتە ل جەم یەزدانی، ل سەر بەختێ من وەک مەلایێ ڤێ میمبەرێ وەک خزمەتکارکێ ڤی ئوولی. ئەڤ عیبادەتێ پیرۆز ھەر کەس ل سەر ھەر ھزر و بیر و ئایدلۆژی و مەزھەب و ئوول ژی بیت ژلایێ یەزدانی دھێتە پەژراندن و جھێ رازیبوونا یەزدانی یە.

ئەڤجا “دین” د ناڤەرۆک دا نە ئەوە دا وە ژ ترسا جەھنەمێ ژ کارێن خراب بدەتە پاش و ژ خوەشییا گەھشتنا بەحەشتێ کارێن باش ب وە بدەتە کرن.

ل داوییێ

والسلام علی البشریە.

مافی بڵاوکردنەوە بۆ نوسەر و کولتور مەگەزین پارێزراوە! ڕێنوس و خاڵبەندی تایبەتە بەنوسەر خۆی.
مافی بڵاوکردنەوە بۆ نوسەر و کولتور مەگەزین پارێزراوە!
ڕێنوس و خاڵبەندی تایبەتە بەنوسەر خۆی.