گازی مرنێ بكەن دا بهێت پرتێن خو یێن نسیای ب ڤێ ژیانێ ڤە خرڤەكەتە سەر ئێک، ل ڤێ پارچەیا ئەردی كوشتن هەر رۆژ ل بەر من را ھاتن و چوونێ دکەت، سلاڤێن مروڤاتیێ ل مە دكەت، تف ل وێ سێڤێ بن ئەوا مرۆڤەكێ بەندە كریە بونەوەرەكێ یاخی، تف ل وێ عەشقێ بن ئەوا هەر رۆژ دئینتە بیرامن چیرۆكا مە ژ كوشتنێ دەستپێكریە، وای هەوار بۆ ڤێ شانوگەریێ، كەنگی دێ پەردە ل سەر هەر تشتی هێنە گرتن؟
نە نوتێن میوزیكێ، نە کەڤالێن رەنگكری و نە گولێن بوهاران، دەربرینێ ژ ژیانبوونێ دکەن. دناڤبەرا من و تەدا پەردەكێ هەلاویستی نینە، نە ئەزم بینەر و نە توی دەرهێنەر. دناڤبەرا من و تەدا كەلەخێن مریا و رەنگێ خوینێ و قێریێن زارۆیانە، تف ل براتی و ئاشتیێ بن، كەنگی جیهان جهێ ترسنوكایە، خودای ژ خەو شیار بکەن، ئەسمانا بەرەڤ هەسارەكا دی فرێبكەن، دەنگێ چەکی ناچیتێ، ل پارچا ئەردێ مە یێ کاڤلكری و ب روندكێن وێ زارۆیا پێخاس هزار سێڤا لێ بچین دا سپێدێ دەینێ خوە بزڤرینین …
پەنجەرا ژوورا من ئێدی شیان نەماینە داڤێن پرچا من تێكەلی بايێ ژ دەرڤە بكەت، ژیان چەند هەناسەكا كوژەكە، تف ل وان هەمی رۆمان و هەلبەست و چیرۆكا بن ئەوێن شیان نەبن دەربرینێ ژ هەر شەش پیتێن ناڤێ تە بكەن، وای هەوار بۆ وان سەحكرنا تو چەند زەلامه كێ جودا بووى دەمێ ب هەمی غرور تە دگۆت” ئەز قەھرەمانێ خەونێن خوداوەندەكێ مە، من ئەو شیان هەبوون كچا خودای ل خو عاشق بكەم”…
ئەز چەند رەنگێ وێ شانۆیا بێ ئەكتەر ددەم، ئەڤ باژێرە یێ بەلنگازە، بكەنە هەوار دا شانۆیەك ژ دایك ببیت، رەنگێ بارانێ و بێهنا ئاخێ هەلباسكی نێرینێن عاشقەکا هەژار بكەن، چەند ئێتیم ل سەر دەپێ شانۆیا تە ژ دایكبوونە، تو چەند زەلامەكێ ئاشوپی بووی نە تە رەنگێ بارانێ دا نە ژی یێ ئاخێ، ب قاسی شۆرەشێن ڤی وەلاتی یێ بێ رامان و بێ ئەنجام بووی، بۆچی بوویە ئەفسانەكا نەمر؟! بوچی یە بوویە داستان و رێبازا دیرۆكا من؟! مانە من یا ژبیركری هەر شۆرەشە هەلگرێن خوە دخۆت؟ تە چەند قەھرەمانێن خوە كرینە تێكستێن شانویێ …
تف ل وێ خەریبیێ بن یا ژ دەرازینكا هەستێن كوژەك رۆناهیێ نەچار دكەت دەهمەنێن خو هەلدەت و پاپۆرا ژیانێ سەر ژ نوی بەرەڤ ئاقارەكێ نەدیار بدەتە رێ، من چەند باران كومكرینە هەتا كانیێن پەیڤا ل بیابانا هەستا بزێن؟ من ژیان ل چەند ئاقارا ب مێرگێن ژیوارەكێ تال خەملاندیە؟ ل بیرامنە كو بەژن كورتیا پەیڤێن من تێرا رامانەكا هەی ناكەن، تف ل وێ پرسیارێ بن یا رۆژانە ئەزەكا شورەشگێر دكرمە سەركردەكا خائین، من دلێ خوە ب چوار پەیڤێن عەشقێ و هەمبێزەكێ فرۆت، ل ستوتینگەها هەستا من هەرو دوهییا خوە دسۆت و ئەڤرۆیا من هێش نەهاتیە، تو چەند زەلامەكێ سەیر بووی، پرتەك ژ تە ژ ئاشوپێ بوو و پرتێن دی ژ ئالوزیان، تو وەكی وێ باروڤێ بووی یا ژ نیشكەكێ ڤە هەر تشتی رادوەستینیت، چ هەست نامینن، نەڤیان، نە بیرهاتن، نەژی هەبوون، ژیان ب هەمی دەربرینێن خو ڤە دهێتە كورتکرن، د چەند خولەكەكا دا، مینا وێ رۆناهیێ یە ل سەر دەپێ شانویێ، ب دروستی ئاها ل وی دەمی دیار دبیت مرۆڤ یێ د مەزنترین درەو دا، پەردەی ل سەر شانویێ بگرن، نەمن شیان هەبوەن دەرهێنەری ببینم، نە ژی من باوەر كر كو ژیان نە پارچەكا شانویێ یە …
