ژنێک دەڕوات بۆ قیامەت

هیراد یاسین – شیعر

Peter Paul Rubens, Siegen 1577 - Antwerpen 1640 Venus und Amor / Venus and Cupid aka Venus at her toilet (ca. 1606 - 1611)
144

ژنێک دەڕوات بۆ قیامەت

شیعر

هیراد یاسین

 

چرۆ عوسمان -پێشانگای سەرمەدی

ژنێک بوو لە دونیا،

قیامەت بانگی کرد.

لەبەر دەرگای ئاخیرەت قەرزەکانی دەدایەوە

دەفتەری قەرزەکانی دەکرد

جلە کوردییەکانی بە سەمای بەرییەوە دا بە چنارێک

سەرپۆشەکەی سپارد بە شەوەزەنگی پەنجەرەیەک

تنۆک تنۆک ئاواتەکانی خڕکردەوە و سپاردی بە گڕی فرمێسک

ماچەکانی وەردەگرتەوە و لەنێو جانتاکەیدا تۆپەڵی دەکردن

سەرجێیەکی دەبەخشی بە هەموو ئەو کوڕانەی کە ڕۆژێک حەزیان کردبوو سەرجێی دەگەڵ بکەن.

ژنێک دەڕوات بۆ قیامەت؛

ژنێک قەرزەکانی ڕایی دەکات…

نیگاکانی لە ئەویندارانی وەردەگرتەوە و دەیدایە دەست چپەی ئەشکەوتەکانی ڕۆژهەڵات…

یادەوەرییەکانی  لە دونیا وەرگرتەوە و لە ملی کرد.

 

لەنێو کۆمەڵی قەرزاراندا هەر من مامەوە تەنیا

ژنە، دەفتەرە قەرزی سوتاند و ناوی من لە خۆڵەمێشیشدا نەبوو.

ژنێک دەڕوات بۆ قیامەت…

قەرزەکانی داوەتەوە و هێشتا قەرزارێک ماوە

ژنێک ڕۆیشت بۆ قیامەت و قەرزارێکیشی لەگەڵ خۆی برد

قەرزارێک چوو بۆ نەگەڕانەوە

تا قەرزەکەی وەربگرێتەوە و بێتەوە.

 

 

 

تایبه‌ت به‌ كولتور مه‌گه‌زین – بیروڕاكانی بابه‌ت و ڕێنوس خاڵبه‌ندی تایبه‌ته‌ به‌نوسه‌ر خۆی. كولتور مه‌گه‌زین. ته‌نها دانانی لینكی بابه‌ت ڕێگه‌پێدراوه‌. هه‌موو په‌ره‌گرافێك و پۆستكردنێك بێ دانانی لینك و ناوی نوسه‌ر و گۆڤاره‌كه‌ دژی یاسای كۆپی ڕایته‌ و لێپێچینه‌وه‌ی یاسایی له‌ دوایه‌. ‌

You might also like More from author

error: Content is protected !!