هەمی جەنگ نەشێن کەنیا زارۆیەکی بەرزەکەن
هەتا من پەرتوکێن جەنگی نەخواندین
من نەزانی بۆچی دیکێل ژ پەرێن کوتران دچیت؟
من هەست ب گەرمییا پیتێن کولایی ل سەر لەشێ نشتیمانی نەکر؟
هەتا من هەلاتنا گولییێن گەنمی هەمبێز نەکری
هێژ دێمێ تە یێ ژ ئازار و گرنژینێ تێکهەل
چ کوریشکان خوە تێ نەئالاند بوو..
هەتا من ئاڤابوونا پەلاتینکا نەڤەخواری
بێهنا گول و کولیلکێن ژ ناڤ برینێن تە دەرکەتین، نەهاتە من
ئێدی زەمەن تێرا هژمارتنا برینان ناکەت
دگەل هژمارتنا برینان، خۆ خوین ژ ژمارەیان ژی دهێت!
ئێدی ئاسمان شانازییێ ب بلندبوونا خوە نابەت
پشتی دەریایێ رەنگێ شین ژ دەست دای..!
حەرف حەرف من روحا رووباری خواند
ل چ ئەردا من هەدارا وی نەدیت..
هەروەکی ئارەزویا خوە د ناڤبەرا رەڤین و زڤرینێ دا بەرزەکری
هەروەکی سەربۆرا هەمی سەفەر و لێگەریانێن وی
تێرا ئاشنابوونا ب رۆناهیێ و تارییێ نەکری..
ل دەمەکی ئەز پێحەسییام
ترس و بەرائەتا زارۆیان و خۆهـ و وەستیانا جۆتیاران..
نوورهـ و شەوقا خوینا شەهیدان و نەفرەت و کینا خائینان..
بەندەمان و دلشکەستنا عاشقان و پەشێمانی و دوعایێن توبەداران..
پرسیار و غەریبییا موسافران.. ئاڤا رووباری تێکهەلی روحا خوە کرینە
ب لەز ئاڤ ژ ناڤ دەستێن من دەرکەفت و خوە بەرزەکر
خۆ نهێنییا گریانا ماسیەکێ ژی نەدا من
ئەو ماسییێن هەمی عەمرێ خوە ژ عشقا ئاڤێ د سەمایێ دا ژبیرڤە دچن..
دلۆپ دلۆپ من لەشێ کانییا دەستڤەدا
ئەز ب سەر فرمێسکێن چنار و بیشەنگ و گیایێ گرنژینا بهارێ هەلبووم.
* * * * * * * * *
د گەل چریسکێن جەنگی هەر وەرزەک بۆ خوە رەڤی
ژ نشکەکێڤە وەرزێ بێهودەییێ ل بەر بوو
نقۆمبوونێ بکەتە موغامەرا زەمانێ سۆتنێ!
بێی کو بزانیت شاهزادەیەکا هەی
هەمی وەرز تێرا هەناسەدانا وێ ناکەن..
هەمی ئاڤ نەشێن رۆندکەکا وێ تەفسیر کەن..
هەمی با لەوەندیەکا وێ ناهەژینین و هەمی ئاخ مژیلانکەکا وێ ناڤەشێرن..
خانمەکە تێکهەل ژ چیرۆکێن ئاخێ و ئارۆنکا ئەوری و سرۆدێن تری و هنار و گەنمی..
ژنەکە پر سۆتن و برین.. کەنی و گرین.. سەفەر و فرین.. هێلان و رەڤین..
پری سنور و کۆچ و مەنفا.. قارەمان و خیانەت.. کفن و گۆر.. قۆربانی و خوین..
پری شورەش و جەنگاوەر و شەهید.. ئالا و فیشەک و تڤەنگ.. دابران و سیمە و مین..
تژی بەفر و گژلۆک و باران.. شلێر و نێرگز و ریحان.. پەلاتینک و پەز و ماسی و هێلین..
تژی رۆناهی و تاری.. قۆرمچین و قەمیان.. شکەستن و ئالزیان.. شینبوون و وەریان و بڕین..
نارینەکە د ناڤبەرا هەلاتن و ئاڤابوونێ دا بوویە ئاسمانەک تژی بیرهاتن
د ناڤ بەرا تۆفان و جەنگان دا هەدارا وێ بوویە پەقینا ڤۆلکانەکێ:
بێهودەیە دەنگێ جەنگێن دوور و چریسەتا پەقینێن نێزیک
هەمی جەنگ نەشێن کەنییا زارۆیەکی بەرزەکەن…
جەنگ بلندبوونا ئاگرییە ژ ناڤ پرچا ئاخێ و چوونا خوینێ یە ژ بن پێن وێ..
جەنگ مژیلی سۆرکرنا ئەردییە دناڤ دیکێلێ را و ژ هەمیا پتر تو گڤاشتییە باوەشا
خوە یا تژی مەرگ و هەژیان و مالقبوون و پەقین.. هێژ جەنگ ل سەر نڤیسینا یاداشتنامەکا
رێنڤیسا وێ بریندار و ب ئەلفبێیەکا تەر ژ خوینێ دهێتە نڤیسین بەردەوامە بێی کو تۆفانەکا دی
ل بەر بیت گۆنەهێن زەمەنی بشۆت و دەستێ خوە ب سەرێ ئاخا بریندار دا بهینیت و ژ بۆ
کوفر و درندەیی و ژ ناڤچوونا جهدەمی، ببیتە رۆناهی و نوویاتی، میهرەبانی و لێبۆرین..
چ تۆفانێن دی نەهاتن..!
هەتا کەنگی ئەور وەکی نەهنگا خوە ل ئاسمانی ب هەلاڤێژن و
دوماهیک باران ژ بیرا دارستانێ چووبیت..
هەروەکی ئەوران ژی ئارەزوویا بارینێ نەمایە؟!
جار وەکی کۆمێن پەلاتینکان دچنە د ناڤ پرچا ئاسمانی را
بێی کو دلۆپەکا ئاڤا گولا ژێ بوەرینن
جار وەکی رەڤدێن گورگان ب لۆرینڤە پەنجێن خوە د سینگی را دبەنە خار
بێی کو دلۆپەکا خوینێ ژ بێدەنگییا ئاسمانی بینن..!
شەرمزاریە ل بەندەمانا بارانێ دوعایا بکەین و
هەر ئێکی ژ مە ئوقیانۆسەک د پاخلا خوە دا ڤەشارتی!
ئۆقیانۆسان دلێ مە نەنماند و ئەم گازندا ژ دلێ ئاسمانی دکەین؟!
ئاسمان نەیێ دلرەقە
لێ روندکێن دەیکەکێ نەرماتییا بارانێ یا ڤەخواری و
خۆهدانا بابەکی پێناسا پیرۆزیێ یا هشک کری..
* * * * * * * * *
پەیڤێن بەفرەکا رەش و ئاوازا ئاگرەکێ بێ رۆناهی
مارشا جەنگێ ئەبەدییە..
جەنگە و بای هەمی کاغەز ڤەرەڤاندن
دا ئێدی ئەو کوترێن شەرمێ ژ فرینا خوە دکەن
ب دمێ خوە یێ ژ خوینێ سۆر ل سەر چ کاغەزا نەنڤیسن
سەفەر.. سەفەر.. سەفەر..
جەنگە و سپیترین سێڤ ب رەشترین ددان دهێتە لەقدان
گەرمترین فلۆت ب لێڤێن بەفرینێن زڤستانێ ڤە دبیتە پەیکەر
فیردەوسترین وەلات ژبۆ چەند جەهنەمان دهێتە هنجنین..
جەنگە و هێشتا روحا من د ناڤ تبلێن عشقەکێ دا دچیتە خار
عشقە و ئەز نزانم چ نهێنی د ناڤ دەستێن خوە دا هەلگرتییە؟
عشقە واتەیا شەڤێ ژ نڤێژ و شەرابێ وەردگریت
بێدەنگی و تنێیاتییا خۆداوەندا ل نهێنیترین ئاخا ئەزەلێ دچینیت
لێ ئەز یێ ب گۆمانم جەنگ
هێمایێن عشقێ ل سەر کفنێ شەهیدبوونا من بنەخشینیت..!
جەنگە و هەر پێلەکا ل سەر شێوێ هێرشەکێ دهێت
ل بەر پێن کناری د سوجدێ دا دمینیت..!
ل بەر لێڤێن دەریایێ هندەک کەلەخ یێن هەین
برینێن وان نیشانێن پرسیارێ نە…؟
ل هنداڤی دەریایێ نەورەس ب حێبەتی فرین و پێنەحەسیان
چاوا پاپۆرا لێگەریانێ ژ بەندەرێ راستیێ دوور کەت و
بەر ب گزیرتا گۆمانێ هندا بوو..؟!
جەنگە و ئەڤ باژارێ خەلکێ وێ ئێشان
جادەیێن وێ ترس و ئالۆزی و راوەستیان
ئاڤاهیێن وێ ئالۆدە ب هەرفین و غۆبارێ
بۆرج و منارەیێن وێ ئاڤابووین ب دەستێن زەهایمەرێ
باخچەیێن وێ مەحتل ژ گۆلان و داروبارێن وێ نۆتێن سترانا ئازارێ..
بەری جەنگی ژی هێدی هێدی باژار دبۆهژی..
جەنگە و جەنگی چ دەرازینک نینن
ژ بلی هشیاربوونا برینەکێ ل سەر لەشێ وەلاتەکێ هێشتا د خەو
ئەڤ وەلاتێ د ناڤ بەرا مان و نەمانێ دا
وەک تابلۆیا جینۆسایدا کەسکەسۆری، رەشی خوە د هەمی رەنگان ئالاند
ب خوین و رۆندکان..
هەمی شارستانیەت شیشت، دیروک نماند
د هەر برینەکا خوە دا شورەشەک چاند و
دوماهی دو دلۆپێن وەلاتی بوونە خالێن د پەیڤا “جەنگ” دا.
دهۆک 3/8/015