خوزی ئەز نوکە ببامە دەڤێ پیانویەکێ
و ئاوازا داوی خەون من گوتبا
خوەزی ببام بالندە
و گەشتا داوی ھەناسە فریابام
خوزی ئەز ببام کەلەگری
و دگەل داوی ئارونکەکێ بداوی ھاتبام
خوزی ئەز شیابام ل خوە بگەرم
بەلکو بو داوی جار من خوە ل قولاچەکێ دیتبا
و من دەستێ خو بسەریدا ئینابا
نەگری.. نەگری
ئەم ھەموو دێ مرین
ئەی سترانا ل ھنداڤ کنارێ میلێ دەمژمێرا نوکە سەمایێ دکەت
کی ھەست ب ڤێ سترانێ دکەت؟
کی ل گەشتەیا ئەزەلێ بوخچکا مرنێ گرێددەت؟
ئەی ئەو دەنگێ نھا من ئەزیەت ددەت
من ل کیژان چاخی
برینەک ھێلایە بلێڤا روژگارێڤە؟
دا تولا جەنگا ژ من ڤەکەی
ئەی داوی بریار خوە ببینە
چەند ھەژاری
ئەی داوی کریار ببینە چەند پۆشمانی
ئەی داوی بیری ببینە ل بەندەمانێ ئەز چ دکەم
ئەی ئەو گریا د گەوریا من دا ئاسێ
ئەز نەمایمە زەلام
دەربکەڤە دێ خەندقم
شەرم ژ پەردەیا کچینیا کیژان برینێ بکەم؟
ئارونکەکا ژەھرکری
ئەز بینمە خار دێ تە کوژم
ئەز بھێلم دێ ئەز مرم
ئەز نزانم کیژان مرنێ بھەلبژێرم؟
ئەی خوەدا
رەشم رەش
ئەی خوەدا
ئەز نەما دەستان بلند بکەم
ئەی خوەد
ئەز نەما بگریێم
ئەی خوەدا
داوی ھەناسامن لکوڤەیە دا بھەلکێشم
بێزارم .. بێزار
ژ پەردەیا کیژان دەپێ شانویێ بدەرکەڤم
ل ڤێ شەڤێ کیژان ئێڤارێ بژەنم
ب ڤێ دەردەسەریێ کیژان مۆزیکێ بکەمە ئێڤار
من ژڤانە ئەی راستی
ئەز روندکا خوە بکیژان درەوێ ھندا بکەم
ئەی راستی ھێش تو زارۆ زۆری ل تە ھاتەکرن
نامیسا تە ھەتکاندن
من تو ھەبووی
بێرێزکری
کی مایە دەرێ ھیڤیا وی بقوتم؟
کی مایە نەمری پتر ژمن ب سێ جاران؟
ئەی مێژوو ئەز پێکێ شەرابا کیژان رۆژێمە؟
ئەز کورێ کیژان بیریێمە؟
ئەز رێکا کیژان برینێ مە ؟
تف لوێ روندکا بێ ھێزکریم
تف ل دلینیێ
تف ل ھەر پەرێ من نڤێسای
تف لھەر نڤیسینا د باوەشا پەرەکی دا
کی دێ بێژیتە من ئەڤە چەندین سالە
ئەز ژیانێ بۆ کیژان مرن دکەم؟
بێژنە من ئەز مرنێ ل رووپەلێ کیژان شعرا خوە سەرژێ بکەم؟
بەری ئەڤ روندکە بکەڤیت
ئەز کیژان شعرا خوە گوری مرنێ بکەم؟
نە.. کا راوەستن
مرن
مرن
بلا شعرا من بژیتن.
۱۳/۱۲/۲٠۱٥
کیێڤ/ئوکرانیا
ڕێنوس و خاڵبه‌ندی تایبه‌ته به‌نوسه‌ر خۆی