ئازادی خۆم له‌ده‌ستدا

بڵند جاف

ئه‌دیسۆن كاڤانی
474

ئه‌دیسۆن كاڤانی یاریزانی ئۆرگوایی له‌م چاوپێكه‌وتنه‌دا باسی كێشه‌كانی یاریكردن ده‌كات له‌سه‌ر ئاستی پرۆفشناڵ. باسی منداڵی خۆی ده‌كات و ئه‌و ئاواتانه‌ی كه‌ هه‌ی بووه‌. له‌م چاوپێكه‌وتنه‌دا كه‌ له‌گه‌ڵ سایتی the players tribune ئه‌نجامی ده‌دات باسی ئه‌وه‌ ده‌كات چۆن خه‌ونه‌كان ده‌بنه‌ زیندان بۆ مرۆڤ كاتێك له‌ ئاستی پرۆفشناڵدا یاری ده‌كات. وه‌كوو له‌ نامه‌كه‌یه‌دا بۆ خۆی منداڵ باسی ده‌كات، كاڤانی له‌ ژینگه‌یه‌كی زۆر دژواردا گه‌وره‌ بووه‌. به‌هۆی كه‌م ده‌رامه‌تی و دۆخی ئابورییه‌ قورسه‌وه‌، خۆی و خانه‌واده‌كه‌ی هه‌میشه‌ له‌ گه‌ڕان و ماڵ گواستنه‌وه‌دا بوونه‌، به‌ڵام ئه‌وه‌ی كاڤانی ئارام ده‌كرده‌وه‌ هه‌موو جارێك هه‌بوونی یاریگایه‌كی خۆڵ بووه‌ له‌ نزیك ماڵه‌ نوێكه‌یان. 

كاڤانی له‌ نامه‌كه‌یدا باسی گه‌یشتن به‌ هه‌موو ئه‌و خه‌ونانه‌ ده‌كات كه‌ منداڵه‌ نۆ ساڵانه‌كه‌ هه‌یبووه‌. یاریكردن له‌ مۆنتڤیدیۆی پایته‌خت، گه‌یشتن به‌ ئه‌ورووپا و یاریكردن له جامی جیهانی. هه‌موو ئه‌م هه‌نگاوانه‌ ژیانی كاڤانی ته‌مه‌ن ٣١ ساڵی گۆڕییه‌وه. به‌شێوه‌یه‌ك باشترین خانوو و جوانترین ئۆتۆمبێڵ و زۆرترین هه‌واداری هه‌یه‌، به‌ڵام ئازاد و شاد نیه‌ به‌قه‌د منداڵه‌ ٩ ساڵانه‌كه‌. ئه‌و منداڵه‌ ٩ ساڵانه‌ی كه‌ ته‌نانه‌ت قژێكی ته‌واویشی نه‌بوو و له‌گه‌ڕه‌كه‌دا هه‌مووان به‌كه‌چه‌ڵ بانگیان ده‌كرد، هێشتا له‌ كاڤانی ٣١ساڵان دڵخۆشتر و ئازادتره‌. كاڤانی ئێستا ژیانی له‌ ماڵه‌وه‌ بۆ ناو پاسه‌ و له‌ پاسه‌وه‌ بۆ ناو یاریگا و له‌ یاریگاوه‌ بۆ ئوتێل و له‌ ئوتێڵه‌وه‌ بۆ ناو فڕۆكه‌ و له‌ فڕۆكه‌وه‌ و بۆ مه‌شق و ڕاهێنانه‌كانه‌ و هیچیتر. بووه‌ به‌ زیندانی خه‌ونی كاڤانی ٩ساڵان. به‌بیر ده‌هێنێته‌وه‌ كه‌ به‌ منداڵی پێی وابوو مرۆڤی سه‌ركه‌توو ئه‌و مرۆڤه‌یه‌ كه‌ گه‌رم و گوڕ و پڕ هه‌سته‌ به‌رامبه‌ر ئه‌و كاره‌ی كه‌ ده‌یكات و پێی ده‌لێت تۆ هه‌ڵه‌ بووی. من له‌ ٣١ ساڵیدا تێگه‌یشتم مرۆڤی سه‌ركه‌توو ئه‌وه‌یه‌ كه‌ به‌ داناییه‌وه‌ ژیان به‌سه‌ر ده‌بات. 

هه‌رچۆنێك بێت له‌ كۆتاییدا كاڤانی ٣١ ساڵان له‌ نامه‌كه‌یدا بۆ خۆی منداڵ ده‌ڵێت: دڵته‌نگ مه‌به‌، شتێك هه‌یه‌ هه‌ر وه‌كوو خۆی ده‌مێنێته‌وه‌ سه‌ره‌ڕای گۆڕانكارییه‌كان. كاڤانی ٣١ منداڵه‌كه‌ی ناو خۆی ئارام ده‌كاته‌وه‌ و ده‌لێت: بێ خه‌مبه‌ له‌ هه‌ركوێییه‌ك یاریی بكه‌یت و ژیانت هه‌رچۆنێك تێپه‌ڕێت، تۆ هه‌میشه‌ ٩٠ خوله‌ك ئازادیت. ٩٠ خوله‌ك كه‌ له‌ هێله‌ سپێكانی ده‌ره‌وه‌ی یاریگاوه‌ ده‌رباز ده‌بیته‌ ناو یاریگاكه‌وه‌. چیتر له‌وێدا كاڤانی ٣١ سالان چاوی ده‌كه‌وێته‌وه‌ كاڤانی ٩ ساڵان و هه‌ست به‌ خۆڵی ژێر پێیی منداڵه‌كه‌ ده‌كات سه‌ره‌ڕای ئه‌وه‌ی له‌ یاریگاكه‌ی نێوه‌ ده‌وڵه‌تی پڕ هانده‌ردا یاری بكات یاخود له‌ ته‌نیشت ماڵی خۆیان. 

ئه‌م نامه‌یه‌ی كاڤانی یه‌كێكه‌ له‌ نامه‌ جوانه‌كان كه‌ پێویسته‌ هه‌موو بینه‌ر و هانده‌ر و منداڵێك كه‌ خه‌ون به‌یاریكردن له‌سه‌ر ئاستی پرۆفشناڵ ده‌بینێت، بیخوێنێته‌وه‌. چوونكه‌ لێره‌دا كاڤانی كۆمه‌ڵێك چه‌مكی گرنگ ده‌خاته‌ به‌ر باسه‌وه‌ و پرسیاری ورد له‌ناوماندا ده‌وروژێنێت ده‌رباره‌ی ئازادی و سه‌ركه‌وتن و خه‌ونه‌كانمان. چی له‌ باره‌ی ئه‌م چه‌مكانه‌وه‌ ڕاسته‌ و چی هه‌ڵه‌یه‌؟ چۆن بتوانین خه‌ون ببینین و له‌ هه‌مان كاتدا نه‌بینه‌ زیندانی خه‌ونه‌كانمان؟؟ ئازادی و سه‌ركه‌وتن چۆن ده‌بنه‌ ته‌واوكه‌ری یه‌كتری؟؟ و گه‌لێك پرسیاری دیكه‌ كه‌ پێویسته‌ هه‌موو كه‌سێكی خاوه‌ن خه‌ون و دنیابینی گه‌وره‌ به‌ به‌رده‌وامی بیریان لێ بكاته‌وه‌ و ئاگاداریان بێت له‌ میانه‌ی سه‌فه‌ره‌كه‌ی بۆ گه‌یشتن به‌و خه‌ونه‌ …

بۆ خوێندنه‌وه‌ی ته‌واوی نامه‌كه‌ی كاڤانی كلكی ئێره‌ بكه‌

مافی بڵاوکردنەوە بۆ نوسەر و کولتور مەگەزین پارێزراوە! ڕێنوس و خاڵبەندی تایبەتە بەنوسەر خۆی.
مافی بڵاوکردنەوە بۆ نوسەر و کولتور مەگەزین پارێزراوە!
ڕێنوس و خاڵبەندی تایبەتە بەنوسەر خۆی.

You might also like More from author

Comments are closed.