حیكایه‌ته‌كانی كالچیۆ: له‌ ساواییه‌وه‌ تا پیشه‌گه‌ری ٢

47

پاش بڵاوبوونەوەی بەشی یەکەم،

بەشی دووەم:

له‌ دوای په‌یماننامه‌ی ڤریجیۆوە، گۆڕانی گه‌وره‌ له‌ بازاڕی كڕین و فرۆشتنی یاریزان له‌ ئیتاڵیا ڕووی نه‌دا. هاوكات یاریكردنی یاریزانی بیانی تاكوو سه‌ره‌تای هه‌شتاكانی سه‌ده‌ی رابردوو، هه‌ندێكجار ئه‌سته‌م و هه‌ندێكجار له‌ژێر كۆمه‌ڵێك یاسای توندوتیژدا بوون. هه‌ربۆیه‌ له‌و ماوه‌یه‌دا كه‌ ته‌نها ئیتاڵییه‌كان و ئوریوندییه‌كان بۆییان هه‌بوو یاری بكه‌ن، كالچیۆ به‌سه‌رده‌مێكی چه‌قبه‌ستوو و داخراندا تێپه‌ڕی. له‌گه‌ڵ ئه‌وه‌شدا ده‌بێت ئاماژه‌ به‌وه‌ بده‌ین كه‌ ئیتاڵیا له‌ ماوه‌ی شه‌سته‌كانی سه‌ده‌ی ڕابردوودا، چ له‌سه‌ر ئاستی یانه‌كان و چ له‌سه‌ر ئاستی هه‌ڵبژارده‌ی نیشتمانی، سه‌ره‌ڕای ئه‌م داخرانه‌  پرشنگدارترین ساته‌كانی خۆی نووسیوەته‌وه‌.

zico_austria_1
كۆمه‌ڵێك وێنه‌ی جیاوازی زیكۆ له‌گه‌ڵ یانه‌ی ئۆدێنێزیدا، له‌ یه‌كێك له‌ وێنه‌كاندا خۆپشیاندانی جه‌ماوه‌ری شاری ئۆدینی ده‌رده‌كه‌وێت كه‌ دروشمی (یان زیكۆ یان نه‌مسا)یان تێدا به‌رزكردووه‌ته‌وه‌.

ساڵی ١٩٨٢ گۆڕانێكی گه‌وره‌ی جه‌وهه‌ری به‌سه‌ر تۆپی تۆپی پێی ئیتاڵیدا هات، ئه‌مه‌ش كاتێك یه‌كێتی تۆپی پێی وڵاته‌كه‌ ده‌رگای به‌ڕووی یاریزانی بیانیدا کردەوە، مەرجەدا کە هه‌ر یانه‌یه‌ك بۆی هەبوو ته‌نها دوو یاریزان بكڕێت. پاشان له‌ ساڵی ١٩٨٨دا ژماره‌كه‌یان به‌رزکردەوە بۆ سێ یاریزانی ده‌ره‌وه‌ی كیشوه‌ری ئه‌وروپا و لە هەمان کاتدا یانه‌كان ئازادی كڕینی یاریزانی ئه‌ورووپیان پێدرا. هه‌ربۆیه‌ له‌ ماوه‌ی هه‌شتاكاندا میركاتۆی ئیتاڵی هه‌ڵكشانێكی به‌رزی به‌ خۆیه‌وه‌ بینی، چوونكه‌ یانه‌كان توانیان هه‌وایه‌كی نوێ هه‌ڵمژن دوای چه‌ندین ساڵ له‌ دابڕان له‌گه‌ڵ دونیای ده‌ره‌وه‌دا. یانه‌كان  ده‌رگاكانیان بۆ کرایەوە تاكوو ده‌ست بۆ ئه‌و مروارییه‌ جوان و گرانبه‌هایانه‌ ببه‌ن كه‌ له‌ بازاڕه‌كانی دونیای ده‌ره‌وه‌ ده‌فرۆشران.

ڕه‌نگه‌ یه‌كێك له‌ به‌ناوبانگترین ئه‌و پرسانه‌ی كه‌ له‌ سه‌ره‌تای هه‌شتاكاندا ئیتاڵیای هه‌ژاند، پرسی كڕینی پیلێی سپی بووبێت. ساڵی ١٩٨٣كاتێك یانه‌ی ئۆدینێزی ویستی زیكۆی به‌رازیلی له‌ یانه‌ی فلامینگۆ بكڕێت، توڕه‌بوونێكی زۆر له‌نێو یانه‌ گه‌وره‌كانی دیكه‌ی ئیتاڵیا و  یه‌كێتی تۆپی پێی وڵاته‌كه‌ دروستبوو، چوونكه‌  یانه‌ی ئۆدینێزی بڕی ٤ ملیۆن دۆلاری بۆ كڕینی یاریزانه‌كه‌ ته‌رخانكردبوو. بێگوومان ئه‌و بڕه‌ پاره‌یه‌ هه‌رگیز له‌گه‌ڵ توانای ئابووری یانه‌كه‌دا نه‌ده‌گونجا، بۆیه‌ به‌گومانی پاڵپشتیكردنی ماددی، گرێبه‌سته‌كه‌ له‌لایه‌ن بازرگانانی ده‌ره‌وه‌ی یانه‌كە، كه‌ ئه‌مه‌ش شتێكی ته‌واو پێچه‌وانه‌ی یاساكان بوو، لە ڕێی په‌رله‌مانی وڵاته‌كه‌وە گرێبه‌ستی كڕینی پێلێی سپی ڕاگیرا و زیكۆ له‌ سنووری ئیتاڵیا ده‌رگای لێداخرا. دوای ئه‌م بڕیاره‌ ناڕه‌زایی جه‌ماوه‌ری ئۆدینی گه‌یشته‌ لووتكه‌ و خه‌ڵكی كه‌وتنه‌ سه‌ر شه‌قامه‌كان. به‌ دروشمی ‘O Zico, o Austria!- یان زیكۆ یان نه‌مسا’ هه‌ڕه‌شه‌ی جیابوونه‌وه‌یان له‌ ئیتاڵیا ده‌كرد. بێگومان هه‌ڕه‌شه‌ی خه‌ڵكی ئۆدینی باكگراونێكی مێژووی هه‌بوو كه‌ ده‌كرا ببێته‌ هۆی دووباره‌ دروستبوونه‌وه‌ی كێشه‌ له‌ نێوان نه‌مسا و ئیتاڵیا له‌سه‌ر ئه‌و ناوچه‌یه‌، به‌ڵام له‌ كۆتایدا ئاشكرا بوو كه‌ هه‌ڕه‌شه‌كه‌ ته‌نها جۆرێك بوو له‌ تاكتیك بۆ ترساندنی كاربه‌ده‌ستانی وڵاته‌كه‌. به‌هه‌رحاڵ خۆپیشاندانه‌كانی جه‌ماوه‌ری یانه‌كه‌ كاریگه‌ری خۆی هه‌بوو، چوونكه‌  له‌كۆتاییدا زیكۆ بۆ ماوه‌ی دوو وه‌رز بۆ یانه‌كه‌ یارییكرد و دواتر به‌هۆی پێكانه‌وه‌ گه‌ڕایه‌وه‌ به‌رازیل، به‌ڵام له‌ ماوه‌ی ئه‌و دوو وه‌رزه‌دا زیكۆ بۆ تاهه‌تایه‌ جێگه‌ی خۆی له‌ دڵی گه‌لی ئۆدینیدا كرده‌وه‌. پرسی گرێبه‌سته‌كه‌ی زیكۆ ده‌توانێت وێنای ئه‌و حاڵه‌ته‌ هیستیرییه‌ بكات كه‌ جه‌ماوه‌ر و یانه‌كانی ئه‌و كاته‌ی ئیتاڵیا پێیدا تێده‌په‌ڕین. یانه‌كان وه‌كوو ئه‌وه‌ی له‌ سه‌فه‌رێكی دوور و درێژی بیابان گه‌ڕابێتنه‌وه‌، تینووی كڕینی یاریزانی بیانی بوون، به‌ هه‌رچی مه‌رج و نرخ و شێوازێك بێت، جا ئه‌گه‌ر بە ڕێگای یاسایی بووبێت یاخود نایاسایی. هه‌ربۆیه‌ چه‌ندین چیرۆكی سه‌رشێتانه‌ی له‌م شێوه‌یه‌، سیمای ئه‌وكاته‌ی تۆپی پێی ئیتاڵی نه‌خشاند.

له‌سه‌ره‌تای هه‌شتاكانه‌وه‌، سه‌ره‌ڕای كوالێتی و پلان و شێوازی به‌ره‌وپێشچوونی تۆپی پێی ئیتاڵی له‌ دونیای پیشه‌گه‌ریدا، ئاشكرا بوو كه‌ كالچیۆ  به‌ره‌وه‌ سه‌ره‌تای كۆنترۆڵكردنی دونیای تۆپی پێ ده‌چێت. ده‌وڵه‌مه‌ندیی یانه‌كان و لاوازیی یاساكان له‌به‌رامبه‌ر ڕێگه‌گرتن له‌ هاتنه‌ ناوه‌وه‌ی داهاتی نایاسایی بۆ خه‌زینه‌ی یانه‌كان، هاوكات میوانداریكردنی مۆندیالی١٩٩٠، هه‌روه‌ها ده‌ركه‌وتنی داهاتی په‌خشی ڕاسته‌خۆی ته‌له‌فزیۆنه‌كان، هه‌مووی هۆكاری ئه‌وه‌ بوون ئیتاڵیا له‌سه‌ره‌تای نەوەدەکانەوە كۆنترۆڵی دونیای پیشه‌گه‌ری تۆپی پێ بكات. له‌ڕاستیدا یاریگاكانی ئیتاڵیا له‌ مۆندیالی ساڵی٩٠دا به‌ ڕواڵه‌ت نیشانده‌ری زه‌نگینی  و ته‌ندروستباشی كالچیۆ بوو. هه‌ربۆیه‌ له‌و كاته‌دا شه‌پۆلێك له‌ كڕینی یاریزانی بیانی له‌لایه‌ن بچوك و گه‌وره‌ی نێو دنیای كالچیۆ ده‌ستپێكرد . ئه‌ی سی میلان سێ هۆڵه‌ندی و ئینته‌رمیلانۆ ده‌سته‌یه‌ك یاریزانی ئه‌ڵمانی. ئه‌مه‌ جگه‌ له‌ یانه‌كانی ناوه‌ڕاستی ڕیزه‌به‌ندی خوله‌كه‌، وه‌ك فیۆره‌نتینا، لاتسیۆ، پارما شانه‌به‌شانی یوڤانتووس و ڕۆمایش خاوه‌ن كۆمه‌ڵێك ناوی گه‌وره‌ بوون كه‌ به‌ بڕه‌ پاره‌یه‌كی خه‌یاڵی كڕدرابوون. سه‌رژمێرییه‌كانی ئه‌وكاته‌ پێمان ده‌لێت كالچیۆ له‌ ماوه‌ی ساڵانی ١٩٩٠دا له‌ڕێگای هه‌ریه‌ك له‌ جیان پێیر پاپین، ڕۆناڵدۆ دالیما، جانلویجی لێنتینی، جانلۆكا ڤیالی، كریستیان ڤێری و هێرنان كریسپۆوه، ٦ جار ‌ ڕیكۆردی گرانبه‌هاترین یاریزانه‌كانی جیهانی شكاندووه‌. به‌ڵام هه‌موو ئه‌مانه‌ پێكه‌نینی پێش گریان و بێده‌نگی پێش تۆفان بوون.

له‌گه‌ڵ گه‌شه‌كردنی دونیای پیشه‌گه‌ری له‌ ده‌ره‌وه‌ی ئیتاڵیا، لاوازی و پوكانەوەی كالچیۆیش له‌ نێو ئه‌م دونیایەدا ده‌ركه‌وت. بۆنموونه‌ كاتێك له‌ ئینگلته‌را یانه‌كان خاوه‌نی یاریگای خۆیان بوون، له‌ ئیتاڵیا جگه‌ له‌ یوڤانتووس, ئۆدینزی و ساسۆلۆ،  تاكوو ئه‌مڕۆش یاریگاكان سەربە شاره‌وانی شاره‌كانه‌ و یانه‌كان هه‌موو وه‌رزێك به‌ كرێی ده‌یگرن. هاوكات كه‌ له‌ ئیسپانیا و ئه‌ڵمانیا خاوه‌نداری یانه‌كان بۆ دانیشتوانی شاره‌كان و كۆمه‌ڵه‌ خێرخوازه‌كان ده‌گه‌ڕایه‌وه‌، له‌ ئیتاڵیا سه‌رمایه‌دار و بازرگانی گه‌وره‌ی ساخته‌كار كه‌ سه‌رمایه‌كه‌یان به‌ ڕێگای نایاسایی كۆكردبووه‌وه‌، ده‌بوونه‌ خاوه‌نی یانه‌كان. یاخود كه‌ وڵاتانی ده‌ره‌وه‌ هه‌وڵیانده‌دا بازاڕی دیكه‌ له‌ كیشوه‌ر و وڵاتانی دیكه‌ بكه‌نه‌وه‌ و بنكه‌ی جه‌ماوه‌ریان له‌ دونیای ده‌ره‌وه‌ فراوانبكه‌ن، ئیتاڵیا ورده‌ ورده‌ قووڵتر ده‌خزایه‌ نێو كێشه‌ی ڕه‌گه‌زپه‌رستی و هۆڵیگانیزمه‌وه‌، یاریگاكان له‌ جه‌ماوه‌ری ئیتاڵیش خاڵی ده‌بوونه‌وه‌، به‌هۆی خراپی هۆیه‌كانی گواستنه‌وه‌ و ناله‌باری كه‌ش و هه‌وا و ئاسایشی یارییه‌كانی خوله‌كه‌وە. هەروەها كاتێك یانه‌كانی دیكه‌ی وڵاتانی ئه‌ورووپا سه‌رقاڵی كردنه‌وه‌ی ئه‌كادیمیای باشتربوون بۆ په‌روه‌رده‌كردنی یاریزانی خۆماڵی، له‌ ئیتاڵیا پشتبه‌ستن به‌ یاریزانی بیانی گه‌یشتبووه‌ ترۆپكی خۆی، به‌جۆرێك یانه‌كان زۆرجار به‌ تیپێكی ته‌واو بیانییه‌وه‌ یارییه‌كانی خۆیان ئه‌نجامده‌دا.

ئه‌مه‌ جگه‌ له‌ كاریگه‌ری نه‌رێیی یاسای بۆسمان له‌سه‌ر هه‌موو ئه‌ورووپا و خودی ئیتالیاش كه‌ له‌ ساڵی ١٩٩٥ له‌لایه‌ن یه‌كێتی ئه‌ورووپاوه‌ هه‌مواركرا. ناوه‌ڕۆكی یاسای بۆسمان؛ ماف ده‌دات به‌ یاریزانانی تۆپی پێ په‌یوه‌ندی بكه‌ن به‌ یانه‌یه‌كی نوێوه‌ بێ ئه‌وه‌ی یانه‌ی كڕیار دانوستان له‌گه‌ڵ یانه‌ی فرۆشیاردا بكات و هیچ پاداشتێکی ماددی پێبدات، ئەمە لە کاتێکدا ئه‌گه‌ر بێتوو یاریزانه‌كه‌ له‌ كۆتا ٦ مانگی گرێبه‌سته‌كه‌یدا بێت له‌گه‌ڵ یانه‌ی پێشوویدا.

ئه‌م یاسایه‌ به‌تایبه‌ت زه‌ره‌رێكی ئێجگار گه‌وره‌ی له‌ یانه‌ بچووك و ئاست مامناوه‌نده‌كاندا، به‌و پێیه‌ی پێشتر یانه‌كان له‌كاتی فرۆشتنی ئه‌و یاریزانانه‌ی كه‌ له‌ ماوه‌ی كۆتایی گرێبه‌سته‌كه‌یاندا بوون، قازانجی ماددیان ده‌كرد، به‌ڵام دوای ده‌رچوونی یاساكه‌، یانه‌كان بۆیان نه‌بوو هیچ داهاتێكیان ده‌ستبكه‌وێت و له‌به‌رامبه‌ریشدا زۆرجار یانه‌ی كڕیار چاوه‌ڕوانی ده‌كرد تاكوو ماوه‌ی گرێبه‌ستی یاریزانی خوازراو ده‌گه‌یشته‌ كۆتایی، ئینجا هه‌وڵی كڕینی ده‌دا. هه‌موو ئه‌م هۆكارانه‌ پێكه‌وه‌ وا ده‌كات بڵێین گه‌شه‌كردنی كالچیۆ، گه‌شه‌كردنێکی ناته‌ندروستبوو، گه‌شه‌كردنێكی پشت به‌ستووبوو  به‌ هێزێكی ده‌ركی كه‌ ده‌كرا له‌ هه‌ركاتێكدا بێت هه‌رەس بهێنێت. گه‌شه‌كردنێكی كوورتخایه‌ن بوو كه‌ هه‌رگیز له‌گه‌ڵ هه‌نگاوه‌كانی دونیای تۆپی پێدا نه‌ده‌گونجا كه‌ زیاتر به‌ره‌وه‌ گڵۆباڵیزم به‌ره‌وپێشه‌وه‌ ده‌چوو.

1041602
كرانۆتی له‌سه‌ر شانی یاریزانه‌كان، دوای بردنه‌وه‌ی نازناوی كۆپا ئیتاڵیا. كرانۆتی جیاواز له‌ تانزی، حه‌زی به‌ ده‌ركه‌وتنی میدیایی و خۆنیشاندانبوو.

ڕه‌نگه‌ له‌ دیارترین ئه‌و دۆسێیانه‌ی كه‌ حاڵه‌تی سه‌رابی كالچیۆ نیشانده‌دات، دۆسێی په‌رمه‌لات بێت‌.  كاتێك هه‌ردوو یانه‌ی لاسیۆ و پارما به‌سه‌رۆكایه‌تی هه‌ریه‌ك له‌ سێرجیۆ كرانۆتی و كالیستۆ تانزی له‌ڕێگه‌ی زنجیره‌یه‌ك ته‌ڵەكه‌ و فێله‌وه‌ توانیان له‌ ده‌فته‌ره‌ داراییه‌كانی لایه‌نه‌ په‌یوه‌ندیداره‌كاندا وانیشانی بده‌ن  خاوه‌ن داهاتێكی ئێجگار گه‌ورەن، له‌كاتێكدا هه‌موو سامانه‌كه‌یان بریتیبوو له‌ كۆمه‌ڵێك هه‌ژماری بانكی خه‌یاڵی له‌ بانكه‌كانی لیشتنشتاین. له‌ ناوه‌ڕاستی نەوەدەکانەوە تاكوو سه‌ره‌تای دووهه‌زاره‌كان كرانۆتی و تانزی به‌پاره‌ی خه‌یاڵی توانیان دوو له‌ به‌هێزترین تیپه‌كانی مێژووی كالچیۆ دابمه‌زرێینن و چه‌ندین یاریزانی گرانبه‌ها بكڕن، له‌ نێوانیشدا دوو جار ڕیكۆردی گرانبه‌هاترین گرێبه‌ستی جیهان بشكێنن. دوای ئاشكرابوونی توانای دارایی ڕاسته‌قینه‌ی هه‌ردوو یانه‌كه‌ و ده‌ركه‌وتنی سه‌رپێچییه‌ ژمێریارییه‌كانی هه‌ردوو یانه‌كه‌، كرانۆتی و تانزی زیندانیكران و یانه‌ی لاسیۆ به‌ سه‌رده‌مێكی ته‌واو تاریكدا تێپه‌ڕی و گه‌یشته‌ لێواری ژێرزه‌مینه‌كانی تۆپی پێی ئیتاڵی، له‌به‌رامبه‌ردا پارما سه‌ره‌ڕای هه‌وڵ و كۆششێكی زۆر بۆ ده‌رچوون له‌ كاره‌ساته‌كه‌، له‌ ساڵی ٢٠١٥ دا ئیفلاسهێنانی خۆی به‌یانكرد و دووباره‌ له‌ژێر ناو و لۆگۆیه‌كی دیكه‌دا له‌ خولی سیریاD ده‌ستبەکاربووەوە. به‌هه‌مان شێوه و له‌به‌شێكی دیكه‌دا دۆسێی په‌رمه‌لاتدای یانه‌ی ڤیۆره‌نتیا تووشی هه‌مان چاره‌نووس بووەوە و له‌  ساڵی ٢٠٠٧دا دووباره‌ له‌ خولی سیریاC دەستیپێکردەوە و هه‌نگاو به‌هه‌نگاو گەڕایەوە خولی پله‌ یه‌كی وڵاته‌كه‌.

به‌مشێیوه‌یه‌ تا ڕۆژگاری ئه‌مڕۆ، ده‌بینین هه‌نگاوه‌كانی ئیتاڵیا له‌ دونیای پیشه‌گه‌ریدا، هه‌نگاوی هه‌ڕه‌مه‌كی و پشتبه‌ستووبووه‌ به‌ ڕووداوه‌ هه‌نووكه‌ییه‌كانی ئه‌و سه‌رده‌مانه‌ی كه‌ تۆپی پێی وڵاته‌كه‌ی پێیدا تێپەڕیوه‌. هه‌ربۆیه‌ هه‌میشه‌ له‌ ژێر ڕه‌حمه‌تی ئه‌و باردۆخانه‌دا ماوه‌ته‌وه‌ كه‌ جیهان به‌گشتی و ئیتاڵیا به‌ تایبه‌تی تێیدا ژیاوه‌.

٦ی یانیوه‌ری ١٨٩٨ تۆپی پێی ئیتاڵی یه‌كه‌مین یاری خۆی له‌ په‌ڕه‌كانی مێژوودا تۆماركرد. یانه‌ی جێنوا ڕووبه‌ڕووی یانه‌ی تۆرینێسی بووەوه‌. له‌ یارییه‌كه‌دا ١٥٤ بلیتی ته‌ماشاكردن به‌ نرخی ١ لیره‌ و ٢٣ بلیتی تریش به‌ نیوه‌ی ئه‌و نرخه‌ فرۆشرا و كۆی داهاتی یارییه‌كه‌ ١٠٠لیره‌ بوو. فیكه‌ی ناوبژیوان ٢،٥ لیره‌ نرخه‌كه‌ی بوو، هاوکات پاسه‌وانی یاریگاكه‌ یه‌ك لیره‌ ڕۆژانه‌ی بوو. ئه‌مڕۆ هانده‌ران به‌ سه‌ده‌ها  یۆرۆ ده‌ده‌ن به‌ بلیتی وه‌رزانه‌ی یارییه‌كان و پۆلیس و پاسه‌وانه‌كان ده‌وران ده‌وری یاریگاكان داده‌پۆشن. له‌ ناوه‌ڕاستی یاریگاكه‌ و له‌ ژێر ئاپۆره‌ی جه‌ماوه‌ردا كۆمه‌ڵێك مرۆڤ به‌ هه‌مان تۆپی ساڵی ١٨٩٨ یاریده‌كه‌ن، به‌ڵام ئه‌مێستا ئه‌وان ته‌نها دكتۆر و پارێزه‌ر و پاسه‌وانان نین. ئەمجار له‌ژێر مێزی دانوستانه‌وه‌ شیرنی و به‌رتیلییان پێنادرێت و گه‌ڕیده‌ی دووره‌ وڵات نین، هه‌روه‌ك چۆن گرنگ نییه‌ له‌ چ ڕه‌چه‌ڵه‌ك و خوێنێكن. به‌ڵكوو ئێستا زیاتر له‌ یاقوت و مرواری ده‌چن، ده‌برسكێنه‌وه‌ و ملیۆنەها ڕۆح له‌ سه‌رانسه‌ری جیهان ده‌هێننه‌ سه‌ر سه‌مای بردنه‌وه‌ و گریانی دۆڕانێك. هه‌ندێك دوورتر ده‌چن و نزیك ده‌بنه‌وه‌ له‌ پله‌ی ئه‌فسانه‌ و هه‌ندێكیشیان بۆ تاهه‌تا ده‌بنه‌ كوڕی خواوه‌نده‌كان و تیاشیاندا هەڵدەکەوێت کە به‌رگی خودی خوداوه‌ند دەپۆشن.  ئیدی نه‌ یارییه‌كه‌ ساوایه‌ و نه‌ یاریزانه‌كانی ئه‌ماتۆرن، ئیدی هه‌مووان له‌ باوه‌شی دونیای پیشه‌گه‌ری و گڵۆبالیزمدا یارییه‌كه‌ ده‌گۆڕن بۆ كه‌ره‌سته‌ی تاكوو ده‌سه‌ڵات و سامانی زیاتری  پێ په‌یدابكه‌ن یاخود ده‌یگۆڕن بۆ ئایدلۆژیایه‌ك كه‌ له‌ به‌رگی سیاسه‌ت، كولتور،  یان نیشتیماندا هانده‌ران مه‌دهۆش دەكات.

سەرچاوە

John Foot, Calcio: A History of Italian Football, Harper Perennial, 2007

مافی بڵاوکردنەوە بۆ نوسەر و کولتور مەگەزین پارێزراوە! ڕێنوس و خاڵبەندی تایبەتە بەنوسەر خۆی.
مافی بڵاوکردنەوە بۆ نوسەر و کولتور مەگەزین پارێزراوە!
ڕێنوس و خاڵبەندی تایبەتە بەنوسەر خۆی.

You might also like More from author

Comments are closed.