ئەی دادوەر… گەر نیشتمان بگەڕێتەوە، پێویستی بە گوڵە

ڤان کۆخ ؛ سروشت
1,547

ئەی باغ… ئێمە هەموومان منداڵی تۆ بووین؛

ئێستاكە: من پاسەوان و عاشقان گوڵكوژ و خودا دادوەر.

من ڕێگر و عاشقان دڵگران و خودا دادوەر.

ئەی گوڵ… سەیری خۆت بكە، خوێنت لێ دەتكێت…

من دەگریم و عاشقان بێدەنگ و خوداش هەر دادوەر.

 

ئه‌ی دادوەر… ئێمە لە وڵاتی پڕ باغستان بووین؛
ئێستاكە: باغستان بۆتە عەردێكی وشك و پارچە پارچە كراو.
سەیر… گشت ڕۆژێك لەم شارەدا، باغێك خاپوور دەكرێت…
كە چۆلەكەكان دەبنە پەناهەندەی لخی درەختی وڵاتێكی دیكە و،
پەپوولەكانیش وەكوو چەكچەكیلكەكان سەریان لێ دەشێوێت.

 

ئەی دادوەر… بەو سەركردانە بڵێ:

با شوێنی باغەكان نەكەنە كۆشكی بڵند،

ئێستا نیشتمان یاخییە و با بگەڕێتەوە.

با نیشتمان بگەڕێتەوە…

گەر نیشتمان بگەڕبَتەوە…

چۆلەكەكان دێنەوە و دەچنەوە سەر لخی درەختەكان.

بولبولەكان دێنەوە و دەچنەوە نێو چەمەنزارەكان.

گەر نیشتمان بگەڕێتەوە…

هەموومان دەبینەوە بە گوڵ و دەچینەوە نێو كۆشی باغ.

گەر باغ دروست بۆوە…

شاعیرەكان دروست دەبنەوە و عاشقەكانیش دووبارە دەبنەوە.

ئەی گوڵ، تۆ بوویتە ڕەمزی نیشتمان

عاشقەكان و سەركردەكان و لەشفرۆشەكان و گوڵفرۆشەكانیش هەر قەساب…

كۆمەكم بكە ئەی دادوەر… چۆن ڕێ لەم هەموو قەسابانە بگرم:

كە خۆشم، خەریكە دەكەومە بەر دەستی قەساب.

پاییزی 2009  /  قەڵادزێ

هاوپۆلی بابه‌ت
error: Content is protected !!